Bashkimi Evropian nuk është përfshirë në çështjen e vizitës eventuale të ministrit të Jashtëm të Kosovës Hashim Thaçi në Beograd, por deklaron se çështjet e tilla do të duhej rregulluar sipas marrëveshjes të cilën palët e kishin arritur kohë më parë.
“Gjatë dialogut për normalizimin e raporteve, është rënë dakord për procedurën e vizitave të ndërjsjella të zyrtarëve të Serbisë dhe Kosovës, e cila parasheh që çdo gjë të rregullohet përmes zyrtarëve ndërlidhës”, ka thënëMaja Kocijançić, zëdhënëse e përfaqësueses së lartë të BE-së për Politikë të Jashtme dhe Siguri, duke shtuar se “BE-ja pret që kjo procedurë të respektohet edhe në këtë rast”.
Zyrtarët në Bruksel, pohojnë se Bashkimi Evropian nuk është i përfshirë më në rregullimin e vizitave të tilla, por këtë tash palët e bëjnë vet dhe kështu ishte edhe në rastin e qëndrimeve të zyrtarëve të Serbisë në Kosovë.
Në të njëjtën kohë, burimet e BE-së në Bruksel thonë se “nuk kanë hollësi rreth ftesës për vizitën e Thaçit në Beograd dhe gatishmërisë së tij për pjesëmarrje”.
Në pyetjet se a i mbështetë vizitat e tilla BE-ja, është deklaruar se “BE-ja mirëpret secilin hap i cili do të mund të ndihmonte procesin e pajtimit dhe të bashkëpunimit në rajon”.
Zyrtarët e BE-së, nuk kanë dashur të komentojnë pohimet që kanë ardhur nga shefi i Policisë së Serbisë, se ministri i Jashtëm i Kosovës Hashim Thaçi, do të arrestohet nëse vjen në Beograd.
Ndërkohë në Bashkimin Evropian, po përgatiten për një takim të nivelit më të lartë javën që vjen, i cili do t’i kushtohet projekteve madhore në infrastrukturën e transportit dhe energjisë në rajonin e Ballkanit perëndimor.
Në këtë takim, do të marrin pjesë gjashtë kryeministrat nga ky rajon.
Menjëherë pas këtij takimi, më 21 prill, në Bruksel pritet të zhvillohet edhe një raund i ri i dialogut mes Kosovës dhe Serbisë, me ndërmjetësimin e përfaqësueses së lartë të BE-së për Politikë të Jashtme dhe Siguri, Federica Mogherini.
Ky do të jetë takimi i dytë i kryeministrit të Kosovës Isa Mustafa dhe atij të Serbisë Aleksandar Vuçiq, prej kohës kur kanë ardhur në krye të qeverive përkatëse.
Në Bruksel, shpresojnë se “ky takim do të shërbejë për të ndihmuar progresin në implemtimin e marrëveshjeve të arritura deri me tash në dialog, që do t’i ndihmonte edhe Serbisë edhe Kosovës për të shënuar hapa të ri në procesin e përafrimit me BE-në.
Serbia në këtë moment është duke pritur hapjen e kapitullit të parë në procesin e negociatave të anëtarësimit në BE, por si kusht e ka përparimin e raporteve me Kosovësraporton rel.
Në anën tjetër, edhe Kosova është në pritje të vendimit të Këshillit të BE-së për të nënshkruar marrëveshjen e Stabilizim Asociimit, për të cilën negociatat kishin përfunduar para një viti.
Në Bashkimin Evropian, thonë se “të dyja palët duhet të dëshmojnë përkushtimin për normalizimin e raporteve, sepse ky është një parakusht për përparimin e tyre në rrugën evropiane”.
