Në kuadër të hetimeve që është duke i zhvilluar Policia e Kosovës për vrasjen e Egzon Mazrekut nga fshati Sopijë e Suharekës, është arrestuar edhe një i dyshuar.
Zëdhënësi në policinë rajonale në Prizren, Hazir Berisha, konfirmoi për KosovaPress se i arrestuari i dytë për këtë rast është nga Suhareka dhe dyshohet që mund të ketë informacione për vrasjen e Egzonit.
Ndërsa në mëngjesin e sotëm policia ka kryer bastisje në tri lokacione në Prishtinë, ku është dyshuar se mund të jenë edhe dy të dyshuarit tjerë që tashmë janë në kërkim.
“Jemi në hetime intensive për lokalizimin e të dyshuarve që dihet se janë edhe dy që po i kërkojmë. Sot në orët e hershme të mëngjesit në bashkëpunim me hetuesit edhe njësit tjera relevante kemi bastisur tri lokacione në Prishtinë, mirëpo nuk i kemi gjetur”, tha Berisha.
Njëri prej të dyshuarve është nga Lipjani, ndërsa i dyshuari tjetër që po kërkohet ende nga Policia është nga Fushë Kosova. Të dy, para disa dite janë zbuluar nga Policia si persona të rrezikshëm ku edhe janë publikuar fotografitë e tyre për t’u identifikuar më lehtë.
