Babai i Franc Konomit gjendet i vdekur në shtëpi

E publikuar: 10/11/2015 18:25
Rreshtat+- AShkronjat+- Printo

Policia dhe morgu: Dyshime për atak. Ekspertizë për bllokim të frymëmarrjes

Babai i Franc Konomit, njërit prej emrave më të njohur në botën e krimit, u gjet dje i vdekur në banesën e tij. Stefan Konomi, 78 vjeç, dyshohet se kishte ndërruar jetë prej më shumë se dy ditësh. Policia u lajmërua nga familjarët, ndërsa disa agjentë shkuan dje në banesën pranë zonës së “Selvisë”, duke shqyer derën e apartamentit. I moshuari ishte pa shenja jeta, ndërsa policia hodhi disa pista për vdekjen e tij. Në fillim u dyshua për vrasje me anë të mbytjes, bllokimit të rrugëve të frymëmarrjes, ndërsa mundësia tjetër është ajo e një ataku kardiak. Për shkak “të famës” që kishte djali i tij në të kaluarën, u mendua se njerëzit që urdhëruan para pesë vitesh vrasjen e të birit, mund të kishin vrarë edhe 78-vjeçarin, gjithsesi do të duhen të tjera ekspertiza nga mjekoligjorët për këtë dyshim. Policia e përforcon dyshimin e saj edhe për pretendimet e Stefanit, për vrasësit e të birit apo bashkëpunëtorët e tij. Franc Konomi ishte 40 vjeç kur u ekzekutua më 8 korrik të vitit 2010, ndërsa babai i tij ka pretenduar, edhe në media, se një mik e futi atë në kurth. Gjithsesi pretendimet e të atit janë shkruar edhe në dëshmitë në polici e prokurori, ndërsa një tjetër konflikt mund të ketë qenë për pronat e Franc Konomit, pasi Stefani ishte i vetmi pjesëtar i familjes që jetonte në Shqipëri. Gjithë të tjerët, përfshirë të venë dhe fëmijët e Konomit, jetojnë në Gjermani, ndërsa vëllezërit dhe nëna jetojnë në Greqi. Në lidhje me vdekjen e 78-vjeçarit, burimet policore pohojnë se kanë marrë një telefonatë nga familjarët e Konomit, ku thuhej se ai prej një dite nuk u përgjigjej në telefon. Gruaja e tij kishte telefonuar të afërmit në Tiranë, teksa edhe fqinjët kishin lajmëruar policinë se nuk e kishin parë së fundmi 78-vjeçarin. Sipas burimeve pranë morgut të Tiranës, në trupin e tij nuk janë gjetur shenja dhune dhe paraprakisht mendohet për një atak në zemër. Dyshohet se ka vdekur para tri ditësh dhe po kryhet ekspertiza për të përcaktuar nëse rrugët e frymëmarrjes janë bllokuar nga objekte të tjera, përveç ndalimit të funksionimit të zemrës. Megjithatë, për shkak të vrasjes së Franc Konomit, po kryhen hetime për vdekjen e 78-vjeçarit. Franc Konomi konsiderohej në Tiranë si një nga “të fortit e rrugës ‘Bardhyl’”. Pas vrasjes së Gaz Muçës më 1992-shin, pranë “Xhamllikut”, Franc Konomi u akuzua nga miqtë e Muçës si një nga autorët, por prokuroria nuk ngriti ndonjëherë akuzë për të. /gazeta-shqip