Luka Mishetiq, avokat i ish-presidentit të Kosovës, Hashim Thaçi, ka kritikuar ashpër efikasitetin e Gjykatës së Apelit që funksionon brenda Dhomave të Specializuara. Mishetiq përmes një shkrimi në platformën X, bëri të ditur se të gjitha apelet në rastin e Thaçit janë refuzuar gjatë këtyre pesë vjet e gjysmë sa ish-presidenti po mbahet atje.
“Paneli i Apelit deri më tani i ka refuzuar secilën prej tyre. Kjo do të thotë 0 nga 40”, thuhet në postimin e avokatit të Hashim Thaçit.
Mbrojtja e ish-presidentit të Kosovës, Hashim Thaçi, ka dorëzuar deri më tani 40 ankesa ndërmjetëse në kuadër të gjykimit për krime lufte në Hagë, por asnjë prej tyre nuk është aprovuar nga Paneli i Apelit.
Në një postim në rrjetin social X Luka Misetic ka shkruar:
“Për hir të plotësisë lidhur me efektivitetin e ankesave në gjykimin për krime lufte ndaj Thaçit: Mbrojtja në gjykimin ndaj Thaçit tashmë ka dorëzuar (dhe përfunduar) 40 ankesa ndërmjetëse. Paneli i Apelit deri më tani i ka refuzuar secilën prej tyre. Kjo do të thotë 0 nga 40 gjatë pesë vjetëve e gjysmë”.
Procesi gjyqësor po i afrohet përfundimit dhe pritet që së shpejti të shpallet vendimi final.
Nga raporti 90-faqesh i ekspertëve britanikë, i cili iu dorëzua para pak ditëve Avokatit të Popullit të Kosovës, u tregua se nga fillimi i gjykimit, në prill 2023 e deri në nëntor 2024, gjyqtarët kishin shpenzuar 71 orë duke pyetur dëshmitarët, shpesh me pyetje spekuluese dhe hipotetike.
Zyrtarisht gjykimi ndaj Hashim Thaçit, Kadri Veselit, Jakup Krasniqit e Rexhep Selimit ka nisur më 3 prill 2023.
Vendimi ndaj tyre pritet të merret më 20 korrik 2026-të.
Organi i akuzës së DHSK-së ka kërkuar dënim me burgim me nga 45 vjet për katërshen e UÇK-së. Kjo u kundërshtua ashpër nga mbrojtja e tyre
