Agjencia e Ushqimit dhe Veterinarisë ka njoftuar se është konfirmuar prania e sëmundjes PPR (Murtaja e Ruminantëve të Vegjël) në fshatin Landovicë të Prizrenit. Përmes një njoftimi për media, AUV tha se kjo sëmundje nuk përbën rrezik për shëndetin e njerëzve dhe nuk transmetohet nga kafsha te njeriu. Megjithatë, AUV tha se ajo shkakton dëme të rënda te kafshët.

“Pas hulumtimeve diagnostike në terren dhe zbatimit të masave për kontrollin e sëmundjes, Laboratori i Ushqimit dhe Veterinarisë ka konfirmuar një rast me PPR në një fermë dele në këtë fshat. Kjo sëmundje nuk është zoonotike, që do të thotë se nuk përbën rrezik për shëndetin e njerëzve dhe nuk transmetohet nga kafsha tek njeriu. Megjithatë, ajo shkakton dëme të mëdha në shëndetin e kafshëve, rrit ngordhshmërinë dhe ka ndikim të rëndë në ekonominë blegtorale”, tha AUV të premten, më 26 shtator.

Sipas njoftimit, masat që ka ndërmarrë Agjencia e Ushqimit dhe Veterinarisë për parandalimin e përhapjes së PPR-së janë: kontrolli dhe mbikëqyrja e vazhdueshme në zonën e prekur, asgjësimi i kafshëve të prekura, kufizimi i lëvizjes së kafshëve në zonat tjera, si dhe njoftimi dhe bashkëpunimi me fermerët lokalë.

Agjencia e Ushqimit dhe Veterinarisë bën thirrje për fermerët dhe qytetarët që të kenë bashkëpunim të ngushtë me shërbimet veterinare.

“Në momentin që identifikohen shenja klinike si temperaturë e lartë, rrjedhje nga hunda dhe sytë, diarre, pneumoni apo kollitje e vazhdueshme, duhet të raportojnë menjëherë te organet kompetente”, tha AUV.

Agjencia u bëri thirrje fermerëve të respektojnë masat dhe udhëzimet e inspektorëve dhe veterinerëve zyrtarë.

“Mos blini kafshë nga ferma të tjera pa e ditur statusin shëndetësor të tyre”.