Agjentët e FBI-së në Shtetet e Bashkuara kanë arrestuar Sajmir Alimehmetin, 22 vjeç, nën akuzat për terrorizëm.
Alimehmeti, i cili është shtetas i natyralizuar amerikan, porse besohet se ka prejardhje nga Shqipëria, dyshohet se ka siguruar mbështetje materiale për një organizatë terroriste.
Ai është arrestuar të martën në shtëpinë e tij në lagjen Bronks të Nju Jorkut.
Zyrtarët thonë se Alimehmeti mendohet se ka ndihmuar një mbështetës të grupit ekstremist Shteti Islamik të udhëtojë në Siri.
Sipas padisë, Alimhemeti ka qenë po ashtu i njohur si Abdul Qawi dhe ka qenë nën vëzhgimin e autoriteteve së paku qysh në vitin 2014, kur i është refuzuar dy herë hyrja në Britaninë e Madhe.
Alimehmeti dyshohet se ka blerë disa thika dhe pajisje ushtarake, kanë thënë prokurorët.
“Alimehmeti akuzohet për veprime që tregojnë synim të qartë për të mbështetur një organizatë terroriste, që është e orientuar në vrasje dhe kaos”, ka thënë prokurori Preet Bharara.
Alimehmeti mund të përballet me 30 vjet burg nëse shpallet fajtor./rel/
