Është arrestuar në banesën e tij në Aleksandri 30 vjeçari Adel Muhamed Salam, peshkatari egjiptian që rrëmbeu anijen Çelepia 2 nga brigjet e Durrësit. Egjiptiani po merret në pyetje për të zbardhur shkaqet e pengmarrjes dhe fatin e dy peshkatarëve shqiptarë, të cilët ndodheshin me të në momentin e shkëputjes së kontaktit me autoritete portuale.
Arrestohet egjiptiani Adel Muhamed Salam, peshkatari që rrëmbeu anijen Çelepia 2, në portin e Durrësit bashkë me dy peshkatarë shqiptarë. 30 vjeçari u arrestua në shtëpinë e tij në Aleksandri, nga marina ushtarake e Egjiptit, për llogari të palës shqiptare.
Pas marrjes në pyetje Salam do të zbardhë çështjen e mbushur me mistër të pengmarrjes së anijes dhe kërcënimeve deri me jetë të dy peshkatarëve Luan Mema dhe Dhimitër Malja, që egjiptiani i bënte në këmbim të shumave të konsiderueshme të parave nga pronari i anijes Çelepia 2.
Në orët e mëngjesit u konfirmua lokalizimi i anijes së peshkimit në një prej porteve të Aleksandrisë, bashkë me tre shtetas egjiptianë.
Adel Muhamed Salam, peshkatari 30-vjeçar njihet nga bashkëpatriotet e tij si person i dyshimtë me prirje kriminale. Prokuroria e krimeve të rënda dhe Interpoli janë në kontakt të vazhdueshëm me autoritetet egjiptiane për gjetjen e dy peshkatarëve shqiptarë, për të cilët nuk dihet ende asgjë.
Anija e peshkimit Çelepia 2 u njoftua e zhdukur mesnatën e 21 qershorit nga pronari i saj, pas humbjes së kontaktit me tre peshkatarët që ndodheshin në bord.
Çfarë ka ndodhur sot në lidhje me anijen shqiptare
Burime të Ora News bëjnë të ditur se është arrestuar egjiptiani Adel Muhamed Salam i cili prej ditësh akuzohet se ka rrëmbyer një peshkarexhe shqiptare së bashku me dy marinarë shqiptarë.
Mësohet se marina ushtarake në Egjipt kreu arrestimin pranë banesës së tij në Alesandri.
Nuk dihet ende fati i dy peshkatarëve shqiptarë, Luan Mema dhe Dhimitër Malja ndërsa dosja është në hetim nga Prokuroria e Krimeve të Rënda.
Ora 08:00: Sot ne mengjes u gjet anija
Sot në mëngjes u mësua se u gjet në Egjipt peshkarexha shqiptare “Çelepia2”. Autoritetet egjiptianë e kishin gjetur anijen shqiptare të zhdukur prej 21 qershorit gjatë orëve të mbrëmjes së të hënës, 27 qershor 2016, në brigjet e Aleksandrisë. Por nuk kishte asnjë gjurmë të pengjeve të peshkatarit egjiptian, pasi brenda bordit të anijes ishin gjetur vetëm tre persona me kombësi egjiptiane.
Sot në mëngjes nuk dihej asgjë për vendndodhjen e rrëmbyesit egjiptian Adel Muhamed Salam dhe as të dy shqiptarëve të marrë peng.
Një ditë më parë, egjiptiani lëshoi kërcënimin e fundit ndaj pronarit të anijes.
Salam i la orën 20:00 të së hënës si afatin e fundit që pronari i anijes të depozitonte në llogari shumën prej 70 mijë eurosh, në të kundërt do të kërcënoi se do të djegë mjetin lundrues.
Por tashmë me gjetjen e anijes, hetimet janë përqendruar te fati i marinarëve të marrë peng.
