Policia e Kosovës ka arrestuar tre persona të dyshuar për tentim mashtrimi dhe falsifikim dokumentesh, pasi dyshohet se kanë tentuar të tjetërsojnë dhe shesin një parcelë prej rreth dy hektarësh në Sllatinë të Fushë Kosovës, duke përdorur dokumente të falsifikuara.
Sipas komunikatës së Policisë, hetimet janë zhvilluar nga Drejtoria për Hetimin e Krimeve Ekonomike dhe Korrupsionit (DHKEK) në Prishtinë, e cila ka siguruar prova që implikojnë të dyshuarit M.T., L.Sh. dhe M.R.
“Policia e Kosovës, me njësitet e saj nga Drejtoria për Hetimin e Krimeve Ekonomike dhe Korrupsionit (DHKEK) – Prishtinë, përmes veprimeve hetimore, ka arritur të sigurojë prova të cilat dëshmojnë se, të dyshuarit M.T., L.Sh. dhe M.R., përmes veprimeve të kundërligjshme (falsifikimin e dokumenteve të Serbisë, përdorimin e dokumenteve të rrejshme si të vërteta, gjithashtu duke prezantuar një person të rrejshëm si person të vërtetë), kanë tentuar që përmes noterit, ta tjetërsojnë/shesin parcelën në sipërfaqe prej rreth 2 hektar me lokacion në Sllatinë të Fushë Kosovës”, thuhet në njoftim.
Policia bën të ditur se të dyshuarit dyshohet se kanë tentuar t’ua shesin të njëjtën pronë disa blerësve, duke synuar të përfitojnë 1 milion e 550 mijë euro.
“Të dyshuarit, njëkohësisht dyshohet që përmes mashtrimit (dokumenteve të falsifikuara), kanë tentuar që të njëjtën parcelë t’ua shesin disa blerësve, në vlerë totale prej 1,550,000.00 euro”, thuhet në komunikatë.
Sipas Policisë, hetimet kanë vërtetuar se të dyshuarit kishin falsifikuar dokumente identifikimi të Republikës së Serbisë në emër të pronarit të ligjshëm të parcelës.
“Personat e dyshuar duke falsifikuar pasaportën dhe letërnjoftimin e Serbisë në emrin e pronarit të vërtetë të parcelës, kanë tentuar që përmes mashtrimit ta shesin pronën e viktimës dhe njëkohësisht t’i mashtrojnë personat tjerë/blerësit, duke ua marrë shumën prej 1,550,000.00 euro (një milion e pesëqind e pesëdhjetë mijë euro)”, thekson Policia.
Lidhur me rastin është krijuar dyshimi se janë kryer veprat penale “Mashtrimi”, “Falsifikimi i dokumenteve” dhe “Legalizimi i përmbajtjes së rreme”, të parapara me Kodin Penal të Republikës së Kosovës.
“Të dyshuarit janë intervistuar me datë 17.07.2026 në prezencën e avokatëve, ku me urdhër të prokurorit janë dërguar në mbajtje prej 48 orësh”, thotë komunikata e Policisë.
