Serbia është afër nënshkrimit të një kontrate për blerjen e 12 avionëve luftarakë francezë Rafale, njoftoi të martën presidenti serb, i cili, shkruan Associated Press, do të shënonte një largim nga furnizuesi i saj tradicional ushtarak, Rusia.

Presidenti Aleksandar Vuçiq foli gjatë një vizite dy-ditore në Paris dhe bisedimeve me presidentin francez Emmanuel Macron, si dhe me përfaqësuesit francezë të mbrojtjes, duke përfshirë prodhuesin e Rafale Dassault Aviation.

Kritikët e armatosjes perëndimore të Serbisë thonë se shitja e avionëve të sofistikuar francezë mund ta inkurajojë Vuçiqin që ndoshta të ndërhyjë ushtarakisht në Kosovën fqinje, një ish krahinë serbe që shpalli pavarësinë në vitin 2008, të cilën Serbia nuk e njeh.

“Udhëheqësi populist serb ka bërë disa kërcënime të tilla të fshehta gjatë muajve të fundit”, shkruan AP..

Gjatë vizitë së tij në Francë, Vuçiq tha se ka pasur një bisedë shumë të mirë me Macron të hënën në mbrëmje, e cila ka zgjatur më shumë se tre orë dhe se “kanë arritur marrëveshje konkrete për blerjen e avionëve luftarakë Rafale”.

Ai tha se kontratat do të nënshkruheshin në dy muajt e ardhshëm në prani të Macron, duke shtuar se blerja e avionëve të sofistikuar do të zgjeronte në mënyrë drastike bashkëpunimin ushtarak dhe të tjera midis dy vendeve.

Detajet financiare të marrëveshjes së mundshme nuk janë bërë të ditura, por mediat pro-qeveritare serbe vlerësojnë vlerën e kontratës në rreth tre miliardë euro (3.2 miliardë dollarë) për të gjithë paketën.

Serbia ka menduar për blerjen e avionëve të rinj Rafale për më shumë se dy vjet që kur rivalja fqinje në Ballkan, Kroacia bleu 12 avionë luftarakë të përdorur të të njëjtit lloj për rreth një miliard euro.

Blerja e mundshme e avionëve Rafale do t’i mundësonte Serbisë të modernizonte forcën e saj ajrore, e cila përbëhet kryesisht nga avionë luftarakë MiG-29 të prodhimit sovjetik, si dhe avionë luftarakë të vjetër jugosllavë.

Rusia është një furnizues tradicional i avionëve ushtarakë, përfshirë helikopterët sulmues, për Serbinë, e cila ka refuzuar t’i bashkohet sanksioneve ndërkombëtare kundër Moskës për pushtimin e saj në Ukrainë.

Armatosja e shpejtë e ushtrisë serbe shqetëson disa nga fqinjët e saj pas shpërbërjes së përgjakshme të ish-Jugosllavisë në vitet 1990.

Serbia, një kandidate për në Bashkimin Evropian, është pothuajse tërësisht e rrethuar nga vendet anëtare të NATO-s.

Gjatë bisedës me Macron në Paris, u diskutua edhe për tensionet në Kosovë, si dhe për bashkëpunimin në fushën e teknologjisë bërthamore dhe ndërtimin e mundshëm të një termocentrali bërthamor në Serbi.