Procedimi i Marrëveshjes për Asociacionin e Komunave me Shumicë Serbe për interpretim tek Komisioni i Venedikut, do të mund të ishte një zgjidhje më e mirë sesa kalimi i çështjes në Gjykatën Kushtetuese e Kosovës, thonë analistët politik.
Sipas tyre, opozita ka krijuar tashmë bindjen se Gjykata Kushtetuese nuk është e paanshme dhe është e ndikuar nga partitë në pushtet.
Publicisti Belul Beqaj thotë se Gjykata Kushtetuese vetëm sa mund ta thellojë problemin, pasi që pritjet janë që ajo të nxjerr një vendim i cili do të shihej në favor të pozitës.
“Komisioni i Venedikut do të ishte një zgjedhje që do ta amortizonte kërkesën e opozitës dhe ndoshta do të linte një hapësirë që të krijohej përshtypja e neutralitetit dhe objektivitetit”.
“E them sërish, që kjo pak a shumë do ta amortizonte një pakënaqësi të akumuluar të opozitës për faktin se është një trup i jashtëm dhe, siç ndodhë tek ne shqiptarët e Kosovës, më tepër u besojmë atyre që vijnë nga jashtë sesa atyre që i kemi brenda”, ka thënë Beqaj.
Procedimi i çështjeve tek Komisioni i Venedikut u takon qeverive, kështu që tash për tash, kjo mbetet vetëm një ide e cila nuk besohet se do të realizohet, ngase Presidentja e Kosovës, Atifete Jahjaga e ka proceduar për interpretim kushtetues marrëveshjen e arritur me Serbinë për Asociacionin e Komunave Serbe në Gjykatën Kushtetuese të Kosovës.
Kjo marrëveshje bashkë me atë për demarkacionin e kufirit me Malin e Zi ka nxitur reagimin e opozitës e cila, në formë proteste, po pengon vazhdimin e punës normale në Kuvend dhe po paralajmëron përshkallëzim të gjendjes edhe përmes protestave në rrugë, nëse marrëveshjet nuk anulohen.
Nëse problemi i marrëveshjes me Serbinë për Asociacionin do të zgjidhej vetëm për kah ana e interpretimit kushtetues, atëherë Gjykata Kushtetuese apo Komisioni i Venedikut do të ishin adresat e qëlluara, thotë në anën tjetër, analisti Imer Mushkolaj.
Por, sipas tij, aktualisht qëndron edhe një problem me opozitën, pasi që ajo në vend të interpretimit kushtetues të marrëveshjes, është lëshuar në kërkesa maksimaliste dhe të palëkundura politike për anulimin e këtyre marrëveshjeve.
“Opozita do të duhej ta zbus kërkesën e saj në kuptimin që të pranojë se çfarëdo vendimi që vjen nga Gjykata Kushtetuese respektivisht nga Komisioni i Venedikut të jetë i mjaftueshëm që ata të vazhdojnë betejën politike në Kuvend. Mirëpo thjeshtë të mos provojnë që të bllokojnë Kuvendin siç janë duke e bllokuar duke bërë kërkesa ekstreme për tërheqjen e nënshkrimeve”, ka thënë Mushkolaj.
Komisioni Evropian për Demokraci nëpërmjet Ligjit – i njohur si Komisioni i Venecias apo Venedikut – është trup këshillëdhënës i Këshillit të Evropës për çështje kushtetuese.
Roli i këtij Komisioni është që të ofrojë këshilla ligjore për shtetet anëtare, në veçanti, për të ndihmuar shtetet që të harmonizojnë infrastrukturën ligjore me standardet evropiane dhe përvojat ndërkombëtare në fushën e demokracisë, të drejtave të njeriut dhe sundim të ligjit./rel/
