Kryetari i LDK-së, Isa Mustafa, priti në takim Ambasadorin e ri gjerman, Christian Heldt, të cilin e falenderoi për kontributin e pazëvendësueshëm të Gjermanisë për shtetin e Kosovës.
Gjatë takimit u bisedua për zhvillimet aktuale në Kosovë dhe proceset tjera të rëndësishme.
Mustafa e njoftoi ambasadorin Heldt për rolin e LDK-së në proceset shtetformuese dhe zhvillimore për vendin dhe shprehu përkushtimin e LDK-së për avancimin e proceseve integruese evropiane, në bashkëpunim të plotë me autoritetet gjermane.
Ndërkaq, ambasadori Christian Heldt e falenderoi Mustafën për pritjen, duke vlerësuar rolin e LDK-së në proceset zhvillimore në Kosovë.
Ambasadori Heldt, po ashtu, shprehu vullnetin e tij për avancimin e raporteve ndërmjet dy vendeve, duke theksuar përkrahjen e mëtejshme të Gjermanisë për Kosovën.
