Zyrtarë të Beogradit vazhdojnë të insistojnë se formimi i Asociacionit të Komunave serbe është kushti kryesor për vazhdimin e dialogut me Prishtinën.
Kështu, drejtori i të ashtuquajturës Zyrë për Kosovën në Qeverinë e Serbisë Marko Gjuriq, duke folur në RTS për formimin Asociacionit…, ka thënë se formimi i Asociacionit të Komunave serbe në Kosovë për Serbinë është temë e të gjitha temave në vazhdimin e pritshëm të dialogut.
Ai ka shtuar, transmeton Koha.net, se Beogradi në këtë vazhdim dialogu, pret që Prishtina të respektojë fjalën e dhënë dhe obligimet e mara duke theksuar se për këtë kërkesë Beogradi e ka përkrahjen e bashkësisë ndërkombëtare.
“Kjo (AKS) për ne sigurisht se do të jetë tema e temave, por do të flasim edhe për mbrojtjen e trashëgimisë sonë kulturore, statusin e Kishës Ortodokse serbe. Janë 84 mijë shtëpi e banesa gjithnjë të uzurpuara, e ka edhe shumë të tjerë që nuk i kanë paraqitur shtëpitë dhe pasuritë e uzurpuara”, ka thënë GJuriq.