Agjencia Kosovare e Privatizimit do të paguaj 315 mijë euro për dy gazeta, një në Serbi e e tjetra në Malin e Zi. Këto para do të shkojnë për publikimin e njoftimeve të procesit të privatizimit, shkruan Gazeta Fjala.
Për gazetën serbe “Dan Graf-Danas”, AKP do të paguaj shumën prej 205 mijë euro, ndërkohqë kurse për gazetën “Daily press Vijesti” nga Mal i Zi, do të paguaj 110 mijë euro për një vit.
Kjo shumë është shumëfish më e lartë se që paguan ky institucion për mediet vendëse.
Muaj më parë AKP për nëntë media elektronike në Kosovë ka ndarë gjithsejtë vetëm 30 mijë euro, raporton Gazeta Fjala.
Sipas përshkrimit në njoftimin për kontrata me gazetat nga rajoni AKP duhet të bëjë publikimet e shpalljeve të ndërmarrjeve në likuidim,listat e punëtorëve, tenderët e Prokurimit si dhe të gjitha shpalljet tjera që janë relevante për njoftimin e publikut te gjerë.
“Është obligim ligjor qe përveç publikimeve te lartcekura ne gazetat vendore jemi te obliguar qe njoftimet ti publikojmë edhe në një gazete në Serbi dhe një gazete në Mal te Zi”, shkruan në këtë njoftim.
Sipas këtyre përshkrimeve AKP ka zhvilluar negociata me te dy gazetat lidhur me çmimet, ndërkohë që vitin e kaluar ka pasur kontrata me to me cmim më të lartë.
“Nga gazeta Danas krahasuar me vitin e kaluar kemi zbritje 3% nga çmimet qe kemi pas deri me tani ndërsa nga gazeta Vijesti kemi ofertën me zbritje prej 4 % krahasuar me vitin e kaluar”, thuhet në këtë njoftim. Kontrata është paraparë të nënshkruhet me 5 shkurt. / Gazeta Fjala/
