Aleanca për Ardhmërinë e Kosovës ka dhënë fjalën se tubimi i thirrur nga opozita më 28 nëntor, do të jetë paqësor.
Këtë e ka thënë ky subjekt politik opozitar përmes një komunikate për media, ku thotë se “manifestimi protestues i 28 nëntorit, do të jetë paqësor dhe i qetë” dhe se “opozita e bashkuar është përcaktuar që në këtë tubim të shpalos kundërshtimin civil e qytetar për dy marrëveshje që rrezikojnë funksionimin normal të Kosovës”.
“Në këtë tubim do ta dërgojmë një mesazh për pushtetin. Askush nuk mund të jetë mbi kushtetutën e kundër interesave të vendit, as me nënshkrime e as me këto dy marrëveshje. Ne do të jemi paqësorë dhe tubimi ynë nuk do ta rrezikojë sigurinë e askujt”, thuhet në njoftimin për media të AAK-së, ndërsa thonë se “Policia e Kosovës le ta kryej e qetë punën e saj”.
“Manifestimi ynë ku do të marrin pjesë i madh e i vogël, nuk mund të lidhet me asgjë, përpos me një kundërshtim qytetar për dy marrëveshjet të cilat tashmë po i kundërshton shumica”, përfundon reagimi i AAK-së.
