Ministri i Punëve të Jashtme i Kosovës, njëherësh lideri i PDK-së, Hashim Thaçi po paralajmëron mbajtjen e zgjedhjeve të reja. I pari i PDK-së në një intervistë dhënë për RTK-në, ka thënë se ai do të dëshironte të vinte në krye të shtetit nga vota e qytetarëve, e jo përmes Kuvendit.
Për të arritur Hashim Thaçi këtë objektiv, Kuvendi duhet ta amandamentoj Kushtetutën dhe të ndërmarrë reformën zgjedhore, e cila do të parashihte zgjedhjen e presidentit drejtëpërdrejtë nga populli.
Burime brenda PDK-së i kanë thënë Gazetës Blic se Hashim Thaçi për dy arsye kryesore nuk preferon që t’i hyjë garës për t’u zgjedhur president, ashtu siç e parasheh marrëveshja e arritur me LDK-në. Arsyeja e parë ka të bëjë me atë se i frikësohet rrezikut që të mos e votoj një pjesë e madhe e LDK-së, dhe pushteti shumë i vogël që sipas Kushtetutës aktuale e ka i pari i vendit.
Dhe si arsye e dytë, sipas burimeve të Gazetës Blic, Hashim Thaçi ka dilema të mëdha që postin e kryetarit të partisë t’ia lë të tjerëve, nga rreziku i përçarjes së partisë, dhe mundësia e madhe që PDK pa të t’i humb zgjedhjet e ardhshme.
Ndërkohë, edhe deputeti i PDK-së, Nait Hsani ka thënë për medie para pak ditësh se koalicioni LDK-PDK është i brishtë, i thyeshëm dhe i paqëndrueshëm për shkak të luftës për dominim në mes të këtyre dy partive.
Sipas tij, LDK-ja është duke tentuar ta dominojë skenën politike për shkak të postit të kryeministrit.
Në këtë kontekst, Hasani ka thënë se ky dominim mund t’i kushtojë PDK-së. Ai ka vlerësuar se PDK-ja mund të humbet nga koalicioni me LDK-në nëse Hashim Thaçi bëhet president me këtë sistem të qeverisjes.
“Nëse do të kemi sistem presidencial, atëherë pushteti koncentrohet në presidencë dhe në këtë rast, me Thaçin president, PDK-ja do të fuqizohet edhe më shumë”, ka deklaruar Hasani./ Gazeta Blic
