Partia Demokratike e Sllovenisë (SDS) në opozitë ka dorëzuar një mocion për largimin nga detyra të ministres së Punëve të Brendshme të këtij shteti, Vesna Gyorkos Znidar, për shkak të ndalimit të kryetarit të Aleancës për Ardhmërinë e Kosovës Ramush Haradinaj javën e kaluar, nga autoritetet sllovene, raporton Arta TV.
Partia e drejtuar nga ish kryeministri slloven Janez Jansha, akuzon ministren Znidar si përgjegjësen e drejtpërdrejtë, ose së paku me përgjegjësi subjektive dhe objektive me rastin e ndalimit të ish kryeministrit të Kosovës, raportojnë mediat sllovene.
Haradinaj qe ndaluar të mërkurën e kaluar në Aeroportin e Lubjanës përderisa po kthehej nga një vizitë zyrtare në Berlin.
Ndalimi i tij qe bërë në bazë të një urdhër-arresti të lëshuar nga autoritetet serbe në vitin 2004, e të qarkulluar në Interpol.
Grupi i deputetëve të kësaj partie ka vlerësuar se ndalimi i Haradinajt “ka shkaktuar një dëmtim vështirë të riparueshëm të marrëdhënieve me Republikën e Kosovës, të cilat kanë qenë shembullore deri para kësaj ngjarjeje”.
“Komplikimi i marrëdhënieve (me Kosovën) do të ketë ndikim negativ në bashkëpunimin ekonomik ndërmjet Republikës së Kosovës dhe Republikës së Sllovenisë, gjë e cila do t’i shkaktojë dëme të mëdha ekonomisë sllovene”, thuhet në kërkesën për interpelancë për ministren e Punëve të Brendshme, përcjell koha.net. “Ajo ka humbur besimin publik dhe më nuk mund të jetë përgjegjëse për t’i ushtruar funksionet për të cilat është emëruar”, thuhet në kërkesë.
Haradinaj qe liruar tri ditë më vonë.
