Ndërsa kanë mbetur vetëm edhe pak orë deri në mbajtjen e seancës së Kuvendit të Kosovës ku pritet të votohen kandidatët për gjyqtarë të Gjykatës Kushtetuese, koalicioni PDK- LDK i drejtuar nga Hashim Thaçi e Isa Mustafa janë përcaktuar se kush do të jenë dy emrat që do të votohen nga ana e legjislativit.
Një zyrtar i lartë i PDK-së në kushte anonimiteti ka thënë për Gazetën Blic se dy partitë në koalicion janë marrë vesh se kush do të jenë dy gjyqtarët e rinj të Gjykatës Kushtetuese. “Safet Hoxha, kryetar aktual i KRPP-së e ka mbështetjen e PDK-së, derisa ish- kandidatja për deputete nga radhët e LDK-së, e gëzon mbështetjen e partisë së saj”, ka thënë ky zyrtar i lartë i PDK-së në kushte anonimiteti, për Gazetën Blic.
Përpos këtyre dy kandidatëve që kanë gjasat më të mëdha për të të marrë nesër besimin e deputetëve të Kuvendit, përkundër asaj që kanë “prejardhje” politike, njëri asamblist i PDK-së në Suharekë, e tjetri kandidate për deputetë, në garë për gjyqtarë të Gjykatës Kushtetuese janë edhe: Gresa Caka, Hashim Çollaku, Remzije Istrefi –Peci dhe Zef Prendrecaj.
Mediet, ndërkohë para disa ditësh kanë raportuar se gjasat shumë të mëdha për t’u zgjedhur gjyqtarë në instancën më të lartë gjyqësore në vend i ka edhe kushërira e ish- kryetarit të Gjykatës Kushtetuese, Enver Hasanit, Remzije Istrefi –Peci.
Kandiatët e lartcekur fillimisht i janë nënshtruar testimit në garën për gjyqtarë të Gjykatës Kushtetuese.
Vlerësimi është bërë nga Komisioni parlamentar për Legjislacion që kryesohet nga deputetja Albulena Haxhiu e Lëvizjes “Vetëvendosje”.
E para që i prin kësaj liste është Gresa Caka- Nimani me 9.35 pikë, e pasuar nga Remzije Istrefi- Peci e cila ka marrë 8.94 pikë, Selvete Gërxhaliu- Krasniqi e cila nga Komisioni Parlamentar për Legjislacion ka marrë 8.6 pikë, Hashim Çollaku i cili mori 8.33 pikë, Safet Hoxha, ka marrë 8.3 pikë dhe është renditur i parafundit, dhe Zef Prendrecaj, i cili i mori vetëm 7.4 pikë.
Ndërkaq, sipas Kushtetutës së Kosovës, një kandidat për gjyqtraë të Gjykatës Kushtetuese pos që nuk duhet të jetë anëtar i asnjë partie politike, ajo duhet të ketë të paktën 10 vjet përvojë punë në fushën e drejtësisë.
Në nenin 4 të Ligjit për Gjykatën Kushtetuese precizohen kushtet për gjyqtarë.
Kushtet shtesë për emërimin e gjyqtareve
-
Gjyqtarët e Gjykatës Kushtetuese duhet të jenë:
1.1. shtetas të Republikës së Kosovës;
1.2. jurist të shquar me reputacion të shkëlqyeshëm profesional me jo më pak se dhjetë (10) vjet përvojë pune profesionale veçanërisht në fushën e së drejtës publike dhe kushtetuese të dëshmuar, mes tjerash, përmes punës profesionale si gjyqtarë, prokurorë, avokatë, shërbyes civil ose mësimdhënës universitar dhe punë tjera të rëndësishme të natyrës juridike;
1.3. individ me reputacion të shkëlqyeshëm moral, të cilët kanë aftësi të plotë veprimi dhe të cilët nuk janë dënuar për vepër penale.
Dy kandidatët e preferuar nga politika, Safet Hoxha dhe Selvete Gërxhaliu – Krasniqi, nuk I plotësojnë këto kushte, siç parashihen në nenin 4, pika 1.2./ Gazeta Blic
