Ambasadorja e SHBA-së në Kosovë, Tracey Ann Jacobson, ka thënë se themelimi i Gjykatës Speciale do të bëhet ose në Parlamentin e Kosovës ose në Këshillin e Sigurimit.
“Ne kemi folur me shumë deputetë dhe vazhdimisht kemi takime me deputetët. Ajo që presim nga deputetët që e përkrahin Specialen dhe bashkë me ata që janë skeptikë, janë dy mundësi: Gjykata Speciale të vendoset në Kosovë me ligjet e Kosovës ose në Këshillin e Sigurimit në OKB, ku ka vende që nuk e kanë pranuar Kosovën dhe nuk janë adhuruese të saj, e që kanë mundësi ta luajnë një rol jo të mirë”, ka deklaruar Jacobson për televizionin publik.
Ajo ka theksuar se nuk sheh ndonjë të keqe nga Gjykata Speciale, por vetëm atë që Kosova mund të ecë përpara drejt integrimeve evropiane.
“Nëse nuk do ta votojnë Gjykatën Speciale në Parlamentin e Kosovës, ne si Qeveri amerikane e kemi bërë të ditur që nuk do ta bllokojmë ndonjë propozim nga Rusia apo ndonjë shtet tjetër që e propozon. Për këtë ne i kemi bërë njëfarë presioni Qeverisë së Kosovës”, ka theksuar ambasadorja Jacobson.
Sipas saj, nëse dështon votimi në Parlamentin e Kosovës, Qeveria amerikane nuk do ta bllokojë atë në Këshillin e Sigurimit.
