Real Madridi pritet pothuajse me siguri të kërkojë një trajner të ri këtë verë, pasi duket pak e mundshme që Alvaro Arbeloa të vazhdojë pas eliminimit nga Bayern Munichu në Ligën e Kampionëve.

Trajneri 43-vjeçar, që zëvendësoi Xabi Alonson në janar, rrezikon ta mbyllë sezonin pa trofe, çka pritet të çojë në mosrinovimin e kontratës së tij.

Disa emra janë përmendur si pasues të mundshëm, përfshirë Jurgen Kloppin dhe Mauricio Pochettinon.

Gjithashtu, edhe trajneri aktual i Francës, Didier Deschamps, i cili do të largohet pas Botërorit 2026, kishte tërhequr interesim nga drejtuesit e “Bernabeu”.

Megjithatë, sipas “L’Equipe” (përmes “Mundo Deportivo”), rrethi i Deschamps ka mohuar mundësinë që ai të marrë drejtimin e Real Madridit këtë verë, duke e hequr atë nga lista e kandidatëve.

Deschamps do të ishte një profil i përshtatshëm, pasi ka treguar se di të menaxhojë lojtarë me ego të mëdha gjatë drejtimit të Francës për më shumë se një dekadë.

Ai gjithashtu ka marrëdhënie të mira me lojtarë si Kylian Mbappe dhe Aurelien Tchouameni.

Ky zhvillim vjen vetëm një ditë pasi u raportua se edhe kandidati kryesor, Klopp, nuk pritet të rikthehet ende në stol, duke e lënë Pochettinon si opsionin më konkret – edhe pse nuk ka garanci që ai do të largohet nga posti i tij me kombëtaren e SHBA-së.

Situata mbetet e hapur dhe interesante, por me kandidatët që po bien një nga një, kjo mund të rrisë edhe shanset që Arbeloa të qëndrojë në krye të Real Madridit./GazetaExpress/