Presidentja e Republikës së Kosovës, Vjosa Osmani i ka kushtuar një postim emocionues Kombëtares së Kosovës, para përballjes historike të Kosovës me Turqinë.

Kjo ndeshje zhvillohet në kuadër të “play-offit” të Botërorit 2026, derisa do të luhet sonte në stadiumin “Fadil Vokrri” në Prishtinë.

E para e shtetit në postimin e saj ka publikuar një video që më parë ishte publikuar nga Federata e Futbollit e Kosovës, ku tregohet një historik i futbollit të Kosovës.

“Kosova ka lindur mes vështirësive e sakrificave, është rritur me krenari dhe sot qëndron në fushë me dinjitet, duke përfaqësuar ëndrrat e një populli të tërë. Ju jeni simbol i qëndresës, i guximit dhe i shpresës. Jemi me ju djema. Me Kosovën përgjithmonë. Me Dardanët” – shkroi Osmani.

Ndeshja Kosovë – Turqi do të luhet nga ora 20:45, dhe fituesi do të shkojë në turneun final të Botërorit 2026, që mbahet këtë verë në SHBA, Kanada e Meksikë.