Kurti i përmend seancat në Hagë në fillim të fjalës së tij

Mandatari për kryeministër Albin Kurti është duke e mbajtur fjalimin e tij në Kuvendin e Kosovës, para se zgjedhje e Qeverisë të vihet në votim.

Ai e ka nisur fjalimin duke përmendur procesin në Hagë, duke e quajtur si orvatje që bie ndesh me kontekstin e luftës çlirimtare.

“Këto dy seanca po i mbajmë pasdite, sepse këto ditë po zhvillohen seancat e fundit të procesit zgjedhor ndaj ish-krerëve të UÇK-së. Kërkesa për 45 vjet për secilin është orvatje që bie ndesh me të vërtetën dhe mohon kontekstin e luftës çlirimtare. Qëndrimi i Qeverisë së Kosovës është i qartë, në Kosovë janë kryer krime ndaj shqiptarëve nga regjimi i Jugosllavisë”, ka thënë ai.

Ai tha se barazimi mes drejtuesve të UÇK-së me regjimin gjenocidal është i paqëndrueshëm dhe shtrembërim faktik dhe historik.

“Më lejoni që t’iu përgëzoj të gjithëve për konstituimin e Kuvendit të legjislaturës së X dhe për funksionet dhe përgjegjësitë e reja që keni marrë. Ju faleminderit të gjithëve për përkushtimin që tregoni ndaj shtetit tonë të përbashkët. Këto dy seanca po i mbajmë në pasditen e mbrëmjes së sotme sepse këto ditë po zhvillohen seancat e fundit të procesit gjyqësor ndaj drejtuesve të UÇK-së, Hashim Thaçit, Jakup Krasniqit, Rexhep Selimit dhe Kadri Veselit. Kërkesa e Prokurorisë për dënimin prej 45 vjetësh burgim për secilin, ku përfshihen edhe pretendimet për krimet kundër njerëzimit, është orvatje që bie ndesh me të vërtetën dhe mohon kontekstin historik e politik të luftës sonë çlirimtare. Qëndrimi i Qeverisë së Republikës së Kosovës që unë drejtoj është i qartë. Në Kosovë janë kryer krime kundër njerëzimit ndaj popullatës civile shqiptare, dhe ato i ka kryer regjimi i Jugosllavisë së Serbisë nën Millosheviqin. Kjo është e dokumentuar dhe e njohur ndërkombëtarisht. Barazimi mes drejtuesve të UÇK-së dhe një regjimi gjenocidal është i paqëndrueshëm, është shtrembërim faktik dhe historik, për familjet e viktimave është i padurueshëm përveçse i papranueshëm”, tha Kurti.

Fjalën e tij Kurti e vazhdoi duke treguar se çfarë bëri për pesë vjet.

“Këto gati 5 vitet e fundit, kemi ndërtuar dhe zhvilluar një Kosovë më të drejtë, më të zhvilluar. Projektojmë se këtë vit bruto produkti vendor do të arrijë 12 miliardë euro. Rritjen ekonomike nuk e kemi mbajtur në shtet, por e kemi shpërndarë në shoqëri”, tha ai.