Një incident i rëndë ka ndodhur sot në fshatin Ivajë të Komunës së Kaçanikut, ku si pasojë e reshjeve të dendura të shiut është shembur një stallë – dhe fatkeqësisht 13 bagëti kanë ngordhur, por dhjetëra të tjera janë shpëtuar.

Klankosova.tv ka siguruar pamje nga vendi i ngjarjes, ndërsa pronari i stallës ka dhënë rrëfimin e trishtë për atë që ndodhi këtë të shtunë.

Shaip Luta në një prononcim për Klankosova.tv ka treguar se kanë arritur t’i shpëtojnë afro 30 prej lopëve, ndërsa të tjerat i ka “zënë dheu në vend”.

“Është shembur kodra edhe m’i ka nxanë lopët. Kanë pshtu 25-30 lopë. 13 copa i ka nxanë në vend. Këto tjerat jo, se kanë qenë matanë” – tha ai.

Bagëtitë që mbeten nën dhe, Luta tha se akoma nuk janë larguar, ndërsa në lokacion kanë dalë zyrtarë policorë dhe nga komuna.

“Sot kanë qenë policia, kryetari i komunës, më kanë vizituar. Nuk kemi ndërmarrë kurrgjë me i hekë njëherë. Nër dhe janë të mbulume lopët”, përfundoi pronari.

Në video shihet se si pronari dhe banorët tentojnë t’i nxjerrin bagëtitë të gjalla nga stalla e shembur.