Ministri në detyrë i Administrimit të Pushtetit Lokal, Elbert Krasniqi, ka thënë se gjithçka është zhvilluar në rregull dhe në përputhje me dispozitat nga Kushtetuta e Kosovës në konstituimet e kuvendeve komunale, përfshirë ato në veri.

Ai u ka uruar mandat të suksesshëm kryetarëve të rinj të komunave.

“Jemi në fazën e konstituimit të Kuvendeve Komunale në mbarë Republikën e Kosovës. Sot janë mbajtur mbledhjet inauguruese në komunat Gjakovë, Graçanicë, Leposaviq, Lipjan, Mamushë, Mitrovicë të Veriut, Novobërdë, Partesh, Ranillug, Shtërpcë, Shtime, Zubin Potok dhe Zveçan. Gjithçka po zhvillohet në rregull dhe në përputhje me dispozitat që burojnë nga Kushtetuta e Republikës së Kosovës”, ka shkruar Krasniqi në Facebook.

Të premten, në katër komunat në veri të vendit u betuan kryetarët e rinj serbë. Ceremonia e betimit të tyre u mbajt në prani të simboleve shtetërore të Kosovës.

Në krye të Mitrovicës Veriore u vendos Milan Radojeviq, në Zveçan Dragisha Miloviq, në Zubin-Potok Milosh Peroviq e Zoran Todiqi në Leposaviq. Ata i përkasin Listës Serbe.

Nga viti 2023, Zubin-Potokun e udhëhiqte Izmir Zeqiri, Erden Atiq ishte në Mitrovicë të Veriut, Lulzim Hetemi në Leposaviq e Ilir Peci në Zveçan. Kryetarët shqiptarë i morën detyrat në maj të 2023-tës përmes zgjedhjeve, pas dorëheqjeve të kryetarëve serbë.