Pjesëtarët e policisë në Maqedoni janë të shokuar pas informatave se Qeveria ka vendosur që çdo polici të vrarë, familjes së tij ti japë 70 mijë euro si dëmshpërblim për jetën e humbur, bën të ditur Zhurnal.
Një person i cili ka dërguar një letër në redaksinë e Agjencisë Zhurnal dhe i cili thotë se është pjesëtar i policisë thekson se “vendimi i qeverisë është përbuzës”.
Ai ka pyetur se si është e mundur që një jetë njeriu të kushtojë 70 mijë euro, duke shtuar se kjo nënkupton se ne nuk kemi asnjë peshë. Sipas tij, “morali i njësiteve speciale ka rënë në pikën zero dhe askush nuk merr guximin që të shkojë në një aksion të ngjashëm si në lagjen e Trimave në Kumanovë ku humbën jetën 8 policë dhe 30 u plagosën”.
Ja çfarë shkruan në letrën e tij personi në fjalë që thotë se është polic
“Po ju shkruj me zemren e thyme dhe me ni shqetsim tmadh per at qi ndodhi nKumanove. Me ni fjal ajo ishte kaspphane e vertet. Un personalisht jam polic dhe ni pjess tmadhe i kam njoft. Un s’dua te besoj qe per nje dit me u vra 8 polic. Ni grup me luftue me shtetin dhe shteti me humb kshtu sma ka marr mendja e as qe kam besu. Pom duket se dikush i shtini nzjarm polict. Jam tu fol me shokt e mi polic, shqiptar e maqedon edhe asnjanit sja merr mendja me shkue ne akci, kur jeta jone po kushtojka 70 mi euro”, ka shkruar një person i cili pretendon se është polic.
Ndryshe, Qeveria e Maqedonisë dje ka vendosur që për aksionin policor në Kumanovë, për familjet e anëtarëve të vrarë të forcave të sigurisë t’u jep një kompensim financiar në shumën prej 70.000 euro për familje.
Qeveria poashtu ka vendosur që të japë kompensim financiar edhe për pjesëtarët e forcave të sigurisë që u plagosën në aksionin policor në Kumanovë. Që oficerit më rëndë të plagosur t’i dhurojë një kompensim financiar prej 40.000 euro në denarë.
Katër policëve që u plagosën rëndë dhe janë nën trajtim intensiv tu jepet kompensim financiar prej 35.000 euro për polic.
