Gjykata e Bosnje e Hercegovinës ka urdhëruar që liderët e Republikës Srpska të dërgohen në paraburgim 3-ditor, menjëherë pasi të ndalohen nën dyshimet për cenim të rendit kushtetues.
“REL” raporton se kjo është konfirmuar nga Gjykata, e cila thuhet se ka urdhëruar paraburgimin e presidentit të Republikës Srpska, Millorad Dodik, kryeministrit Radovan Vishkoviq dhe kryetarit të Asamblesë Kombëtare, Nenad Stevandiq.
Të tre këta, dyshohen për sulm ndaj rendit kushtetues, vepër kjo që parasheh dënim me burg deri në pesë vjet dhe ndalim të ushtrimit të detyrës zyrtare.
Ndërkohë, ata në vazhdimësi kanë shpërfillur thirrjet e Prokurorisë së Bosnjes për t’u paraqitur për intervistim.
Mediumi raporton se sipas Kodit të Procedurës Penale të Bosnjes, parashihet edhe mundësia e lëshimit të urdhrit për sjellje të detyruar për të dhënë deklaratë, nëse personi nuk paraqitet vetë.Nëse kjo nuk është e mundur, hapi i tjetër raportohet se është lëshimi i një fletarrestimi kombëtar.
