Mesfushori i Bayernit të Mynihut, Thiago Alcantara hedh poshtë zërat se ai është djali i preferuar i trajnerit Pep Guardiola në skuadrën gjermane. Sipas ish mesfushorit të Barcelonës, tekniku nuk i ka siguruar një mbështetje të veçantë për shkak të së shkuarës së tyre në klubin katalanas. 24-vjeçari debutoi me Barcelonën në vitin 2009 pikërisht nën drejtimin e Guardiolas, ndërsa në verën e 2013-ës u transferua në Mynih me kërkesë të trajnerit.
“Unë dhe Pep e njohim njëri-tjetrin shumë mirë pasi punojmë bashkë prej një kohe të gjatë. E dimë shumë mirë se çfarë presim nga njëri-tjetri, por asnjëherë nuk më pëlqen kur dëgjoj nga njerezit se jam lojtari i përkëdhelur nga Guardiola. Kjo nuk është e vërtetë. Skuadra përbëhet nga 25 lojtarë dhe të gjithë kanë të njëjtën rëndësi për trajnerin. I jam shumë mirënjohës pasi më ka qëndruar pranë gjatë periudhës së dëmtimit, ai më ka motivuar shumë. Guardiola është një trajner i madh dhe do t’i jem përherë mirënjohës”.
Lojtari spanjoll mungoi gjatë ndeshjeve të fundit të sezonit të shkuar dhe në pjesën më të madhe të këtij sezoni për shkak të një dëmtimi të rëndë por që pas rikthimit ka rezultuar një lojtar vendimtar edhe pse premton më shumë në të ardhmen.
“Nuk kam dyshuar asnjëherë se do të rikthehesha në fushën e lojës. Isha i uritur për të luajtur futboll dhe më në fund kam mbyllur me shumë punë një vit të vështirë. Tashmë jam në dispozicion të skuadrës dhe vetëm kjo ka rëndësi”./supersport.al/
