Presidentja e Kosovës, Vjosa Osmani ka thënë se nuk ka asnjë njohuri e asnjë lidhje me rrethanat që shpien në vrasjen e mbrëmshme në Ferizaj pas raportimeve se për “rrethanat që shpien në këtë vrasje ishin të informuar presidentja Osmani dhe bashkëshorti, Prindon Sadriu”.
Osmani ka kërkuar nga organet e sigurisë dhe ato të drejtësisë që t’i hetojnë me prioritet të gjitha rrethanat e kësaj ngjarjeje dhe “veprimet e këtij portali dhe portaleve të ngjashme” në lidhje me raportimin për këtë rast.
“I njoftoj qytetarët e Kosovës se asnjë njohuri e asnjë lidhje me rrethanat që shpien në vrasjen e mbrëmshme nuk kam as unë e as bashkëshorti im, e aq më pak njohuri për ndonjë rast dhunimi. Rrethanat që e kanë shtyrë Buzhalën dhe të tjerët në përhapjen e këtyre dezinformatave, kërkoj që urgjentisht të hetohen nga institucionet e sigurisë dhe ato të drejtësisë. Buzhala me “Nacionalen”, dhe disa të tjerë, duke më implikuar mua dhe bashkëshortin tim në situata me të cilat nuk kemi asnjë lidhje të vetme, kanë qëllim të qartë të nxitjes së urrejtjes, e cila pastaj rezulton në dhunë”, ka shkruar Osmani në Facebook.
Ndryshe mbrëmë, një zyrtar policor është arrestuar, pasi dyshohet se vrau një person në Ferizaj.
Më vonë është arrestuar edhe një i dyshuar tjetër për bashkëkryerje të veprës penale “vrasje e rëndë”, bëri të ditur Inspektorati Policor i Kosovës.
Viktima u vra në parkingun e një salle dasmash në fshatin Bibaj të Ferizajt i cili sipas Prokurorisë në Ferizaj, ishte në moshë të shtyrë.
