Njohja e shtetit të Palestinës nga ana e Spanjës ka hapur diskutimin që kjo e fundit ta bëjë të njëjtën gjë edhe me Kosovën.
Kështu së paku thotë Stuart Jones, asistent programi në Qendrën për Evropën e Këshillit Atlantik, në një opinion të botuar në “Atlantic Council”.
“Me një erë të përtërirë pas velave të saj që nga pushtimi i plotë i Rusisë në Ukrainë, zgjerimi evropian mund të shohë përparim të ri nga BE-ja nëse Spanja heq mosnjohjen e saj zyrtare të Kosovës, gjë që rrjedh kryesisht nga shqetësimi i Madridit për lëvizjen separatiste katalane. Njohja zyrtare e shtetit palestinez nga Madridi më 28 maj duhet të hapë logjikisht dyer të reja për njohjen e Kosovës, institucionet politike, marrëdhëniet rajonale dhe integriteti territorial i së cilës, pavarësisht mangësive të fundit, kanë qenë prej kohësh gati për një lëvizje të tillë nga Madridi”, thotë Jones, raporton Klankosova.tv.
Ai thekson se që BE të bëjë përparim në objektivat e saj të zgjerimit, Spanja dhe katër shtetet e tjera anëtare të mbetura do të duhet të njohin pavarësinë e Kosovës.
“Ishte një hap në drejtimin e duhur që Spanja të njohë pasaportat e Kosovës në janar të këtij viti, duke i lejuar kosovarët të udhëtojnë pa viza në të gjithë zonën Schengen të BE-së. Spanja duhet të vazhdojë këtë progres duke e njohur sovranitetin shtetëror të Kosovës, siç bëri për Palestinën, për ta çuar topin përpara në këtë prioritet kritik për politikën e jashtme evropiane dhe transatlantike”, potencoi Stuart Jones.
