Kusht për hapjen e negociatave me BE-në nuk është vetëm zbatimi i marrëveshjes së Brukselit., por edhe i 11 pikave në të cilat insiston Gjermania.
Sipas gazetës serbe Blic, Gjermania tash e sa muaj po insiston në zgjidhjen e disa çështjeve që kanë të bëjnë me kapitullin 35 (lidhur me Kosovën), ndër të cilat janë edhe heqja e “Parkut të paqes”, ndërtimi i objekteve në pikëkalimet kufitare nga materiali i fortë, dorëzimi në menaxhim i termocentralit në Ujëmanit, si dhe njohja e pasaportave të Kosovës, transmeton lajmi.net.
Gjatë vizitës në Beograd, shefja e diplomacisë evropiane, Federica Mogherini i ka parqitur kushtet gjermane si kushte për hapjen e negociatave të Beogradit me BE-në, e para së gjithash për negociatat lidhur me kapitullin 35, gjë që e ka konfirmuar edhe ministri i jashtëm serb Daçiq.
“Serbisë i ka ardhur në majë te hundës politika e caqeve lëvizëse. Nuk e pranojmë më praktikën e theksimit të vazhdueshëm të kushteve të reja dhe për këtë kemi biseduar me Mogherinin. Në bisedë ka marrë pjesë edhe kryeministri Vuçiq. Takimi nuk ishte miqësor sepse ishte shumë i hapur”, tha Daçiq.
Në këtë shkrim të gjatë, gazeta serbe përmend edhe 11 kushtet gjermane. Ja cilat janë ato:
Statuti i Asociacionit të komunave në pajtim me ligjet e Prishtinës
Kodi postar për Kosovën
Integrimi i Mbrojtjes Civile në institucione kosovare
Pika kalimi kufitar nga materiali i fortë
Zbatimi i marrëveshjes për energjetikën
Heqja e Parkut të paqes në Mitrovicë
Ndalja e kontrabandës përmes kufirit serb
Njohja e pasaportave kosovare në kufijtë e Serbisë
Pjesëmarrja e Kosovës në forumet rajonale
Heqja dorë nga hidrocentrali i Ujëmanit dhe stabilimentit të transmisionit dhe transmetimit në Vallaç
Integrimi i qeverisjeve lokale (komunale) në sistemin kosovar
