Komisioni parlamentar për Buxhet dhe Financa, nuk e ka miratuar sot kornizën afatmesme të shpenzimeve (KASH) 2016-2018 për Kuvendin e Kosovës.
Anëtarët e komisionit kishin një varg vërejtjesh tek kategoria e shpenzimeve kapitale që Kuvendi ka paraparë të investojë për tre viteve e ardhshme. Deputetët nuk u pajtuan me kërkesën e Kuvendit për blerje të limuzinave, pasi konsideruan shpenzime të panevojshme.
Ata po ashtu nuk u pajtuan që RTK të jetë televizioni i vetëm që të ofrojë kanalin e veçantë për transmetim të aktiviteteve të Kuvendit. Ndërsa, thanë se do të ishte më mirë që të hapet tender për kanalin televiziv të Kuvendit.
Për këtë vendosën që të formohet një grup punues dhe të specifikojnë në detaje kërkesat dhe nevojat e deputetëve në KASH.
Me shumicë të votave Komisioni vendosi që grupi punues i përbërë nga Naser Osmani, Latif Gashi dhe Ilir Deda të fillojnë hartimin e KASH-it.
Ismet Krasniqi, sekretar i Kuvendit të Kosovë, nuk ka arritur t’i bind edhe pas insistimit që ky dokument të miratohet. Ai ka arsyetuar edhe investimet e parapara kapitale.
“Është një ide e kamotshme dhe është një përpjekje në drejtim të asaj që vjen nga shoqëria civile për një transparencë sa më të madhe të punës të pjesës politike apo të punës të komisionit që ka Kuvendi i Kosovës, e që Kuvendi të pajiset me një televizion të vet parlamentar që do të funksionojë në vitet e para në kudër të RTK-së po me tendencë që të pavarësohet sa më shpejtë”, ka thënë Krasniqi.
Sipas tij, për këtë projekt janë paraparë investime në shumë prej 800 mijë eurosh: 200 mijë euro për vitin 2016, 500 mijë euro në vitin 2017 dhe në vitin 2018 – 100 mijë euro.
Bardhyl Meta, anëtar i Komisionit për Buxhet ka pasur vërtetje për këtë projekt. Madje, ka thënë që do të ishte mirë që kryetari i Kuvendit të jetë më këmbëngulës që të hapet tender për kanalin televiziv.
“Nuk mundemi edhe 800 mijë euro me ia dhënë RTK-së. Unë kisha kërkuar mu bo një tender. Me pasë të drejtë televizionet private me bo një ofertë. Atë e bëjnë me 20 vetë. RTK-së i duhen njëmijë vetë për atë punë. Jam i sigurt se çka bëjnë të tjerët me 800 mijë s’e bënë RTK-ja me pesë milionë”, ka thënë Meta.
Naser Osmani ka thënë se duhet raport për investimet në projektin e Vila Gërmisë. Madje, ai ka kërkuar detaje për investimet në objekte të Kuvendit. Ndërsa, Ilir Deda tha se KASH nuk është në harmoni me Ligjin e Kuvendit dhe me MSA-në.
“Komisioni për legjislacion është duke e bërë Ligjin për Kuvendin edhe me atë Ligj ne do të kemi obligime shtesë. Për shkak të MSA-së, ajo të kushton me buxhet. Edhe në këtë kornizë nuk është paraqitur shtesa e kostos totale për Kuvendin e Kosovës”, tha Dedaj. /Kosovapress/
