Guvernatori i Bankës Qendrore të Kosovës, Ahmet Ismaili, ka thënë se BQK-ja nuk e ka shtyrë afatin e zbatimit të Rregullores e cila përcakton që euroja të jetë valuta e vetme që mund të përdoret për pagesa me para të gatshme në gjithë vendin.

Ai për RTV Dukagjini, në emisionin “Debat Plus”, ka thënë se BQK-ja nuk ka dhënë as afat shtesë e as nuk e ka ndryshuar Rregulloren e saj.

“Me lejoni t’ju informoj se BQK nuk e ka shtyrë afatin e zbatimit te rregullores, as nuk ka dhënë afat shtesë, as nuk ka ndryshuar rregulloren e saj. Plani që kemi publikuar vetëm lehtëson efektet e saj tek komuniteti serb, përkatësisht mundëson rritjen e qasjes në financa dhe shërbime financiare.” – ka thënë ai.

Ai ka shtuar se veprimet e planifikuara për këtë qëllim do të ndërmerren nga BQK-ja.

“Veprimet e planifikuara për këtë qellim do të ndërmerren nga BQK dhe institucionet financiare çdo ditë brenda 3 muajsh, por nuk është dhënë asnjë afat shtesë dhe rregullorja është në fuqi nga data 1 shkurt.” – shtoi më tej ai.

BQK-ja njoftoi se ka hartuar një plan të ri për zbatim të lehtësuar të efekteve të rregullores për operacione me para të gatshme në komunitete të caktuara.