Bankave në vend pritet që tu shtohet konkurrenca në tregun e Letrave me Vlerë.
Këtij tregu pritet t’i shtohen edhe kompanitë e Sigurimeve.
Për këtë, Ministria e Financave ka nisur procedurat e ndryshimit të Ligjit të Sigurimeve, në mënyrë që këtyre të fundit t’u lejohen investimet në tregun e letrave me vlerë.
Anëtari bordit të Shoqatës së Sigurimeve të Kosovës, Rrahim Pacolli, i ka mirëpritur ndryshimet e parapara që kanë të bëjnë me liberalizimin e tregut të letrave me vlerë.
Ai për Tribuna Channel ka thënë se kjo do të ndikojë në ngritjen e kompanive të Sigurimeve.
“Ne mirëpresim ndryshimet e propozuara. Disa nga kompanitë e mëdha të sigurimeve, kanë fuqi që të jenë seriozisht pjesë e ankandeve të letrave me vlerë”, ka thënë Pacolli.
Sipas të dhënave nga Banka Qendrore e Kosovës, tregu i letrave me vlerë ka vazhduar të jetë mjaft tërheqës për akterët primarë.
Kjo është evidentuar te rritja e investimeve të bankave komerciale, në letrat me vlerë të qeverisë së Kosovës krahas zvogëlimit të investimeve në letra me vlerë të qeverive të huaja.
