Koalicioni i udhëhequr nga Shtetet e Bashkuara të Amerikës, ku për herë të parë është përfshirë edhe Kanadaja, ka intensifikuar fushatën ajrore duke kryer 19 sulme ndaj caqeve të “Shtetit Islamik” gjatë 24 orëve të fundit, shtatë prej tyre në Siri, ndërsa 12 në Irak.
Avionët luftarakë në Siri kanë goditur automjetet e militantëve sunitë të “Shtetit Islamik”, një garnizon dhe pozicionet luftarake afër Al Hasakah, në Raqqah dhe një bazë në periferi të qytetit kurd, Kobani.
Ndërsa Irak, janë kryer sulme ajrore në shkatërrimin e një tuneli të përdorur nga militantët e “Shtetit Islamik” dhe caqe të tjera të këtij “shteti” afër vendbanimeve Bayji, Mosulit, Sinjarit dhe Tal Afarit.
Nënpresidenti i Shteteve të Bashkuara, Joe Biden, ka thënë se para tetë muajsh, militantët e “Shtetit Islamik” ishin përhapur kudo në Irak, dhe se tani, territori i kontrolluar prej tyre është ngushtuar dukshëm.
Por Biden ia ka kujtuar klasës politike irakiane nevojën për thellimin e bashkimit dhe të bashkëpunimit mes sunitëve dhe shiitëve në institucione, në veçanti brendapërbrenda qeverisë.
Javën e kaluar, qyteti, që njihet si vendlindja e ish diktatorit Sadam Hysein, u çlirua pas një viti kontrolli nga militantët e “Shtetit Islamik të Irakut dhe Sirisë” (ISIS), të cilët në maj dhe qershor të vitit të kaluar pushtuan pjesë të konsiderueshme të Irakut dhe Sirisë dhe shpallën kalifatin e tyre të quajtur “Shteti Islamik”.
Krimet makabre, vrasja e mbi 15 mijë vetave, bëri që irakianët të tejkalojnë ngërçin politik, shiitët pranuan ndarjen e pushtetit me sunitët dhe të përkrahur nga Shtetet e Bashkuara mobilizuan dhe stërvitën ushtrinë për të ndërmarrë ofensiva në çlirimin e territoreve të pushtuara.
Çlirimi i Tikritit me 30 mijë forca ushtarake dhe policore, shumica shiitë, me ndihmën edhe të gjeneralëve iranian, i ka dhënë Irakut moral për të vazhduar ofensivën e radhës, e cila mund të jetë edhe ajo për marrjen e Mosulit, qytetit të dytë për nga madhësia, i cili po ashtu mbahet i pushtuar që prej një viti nga militantët që kryejnë krime në emër të një “Islami të vërtetë”.
Një javë para takimi të planifikuar në mes të presidentit amerikan, Barack Obama dhe kryeministrit të Irakut, Haider al-Abadi, Biden ka dhënë një vlerësim optimist të progresit të Bagdadit zyrtar kundër “Shtetit Islamik”, por i ka porositur irakianët të mos e humbasin ndjenjën e urgjencës së bashkimit politikë dhe të mos përsërisin gabimet e së kaluarës që i solli në këtë pikë. /lajmi.net/
