I nominuari për Kryeprokuror të Shtetit, Aleksandër Lumezi, është vetë ai që përmes një deklarate që e ka dhënë për kallo.com, e ka hequr “sekretin shtetëror”, që po e klasifikon shefi i Inteligjencës Financiare, Dardan Nuhiu, për llogaritë bankare të Lumezit.
Kandidati për të ardhur në krye të organit të akuzës, e ka sqaruar në këtë deklaratë qarkullimin e tij bankar, që dje e kishte publikuar Gazeta Blic, e që për Dardan Nuhiun, Gazeta Blic e Astrit Gashi do të kenë pasoja të pariparueshme.
“Këto janë të ardhurat e mia të cilat kanë hy nga rroga nga viti 2000 deri në vitin 2014 deri kur kam aplikuar për procesin e parë për kryeprokuror. Është e vërtetë se unë jam i autorizuar në dy llogari bankare, njërën të nënës, e tjetrën të axhës tim”, ka thënë Aleksandër Lumezi.
Ai thotë se afatizimi dhe ri-afatizimi i parave në bankë ka krijuar keqkuptime, sepse ajo janë llogaritur si qarkullim bankar dhe jo si shumë reale e cila gjendet në llogari.
“Ato mjete janë për një kohë të gjatë në bankë dhe unë kam qasje në këto para vetëm nëse ata vdesin. Paratë nuk janë në atë shumë në të cilën janë publikuar. Në konton e nënës sime janë rreth 70 mijë euro, ndërsa në të axhës janë 40 mijë euro. Të dhënat që janë publiku janë të dhëna për qarkullimin bankar e jo për shumën e parave të cilat janë të deponuara”, shton Lumezi, raporton gazeta blic.
“Shifrat janë të atilla për shkak se këto para sa herë që janë afatizuar apo janë transferuar janë llogaritur si qarkullim bankar. Nëse kanë qenë 40 mijë euro në konto dhe janë afatizuar për një vjet, atëherë pas një viti është dashur të afatizohen sërish dhe në atë moment ato regjistrohen si qarkullim i ri bankar. Mirëpo, paratë janë të njëjtat po ato 40 mijë euro”, sqaron Lumezi.
