Zëdhënësi i Qeverisë së Kosovës, Përparim Kryeziu, ka thënë se dokumenti që ka qarkulluar mbrëmë për sa i përket draft-statutit të Asociacionit, nuk është ai i cili e ka në dorë kryeministri Albin Kurti.
“Dokumenti që është publikuar dhe që ka qarkulluar mbrëmë në disa portale dhe televizione si ‘draft-statut i Asociacionit të Komunave me Shumicë Serbe’ absolutisht nuk përkon me propozimin Evropiano-Amerikan që i është dorëzuar kryeministrit Kurti në takimin e 21 tetorit si plan për ecjen përpara”, ka shkruar Kryeziu.
Draft-statuti për themelimin e Asociacionit të Komunave me Shumicë Serbe, që ka qarkulluar mbrëmë në media ndër të tjera thoshte se Asociacioni “siguron një vetëqeverisje kornizë me autonomi substanciale për komunitetin e serbëve të Kosovës”.
Njoftimi:
Dokumenti që është publikuar dhe që ka qarkulluar mbrëmë në disa portale dhe televizione si “draft-statut i Asociacionit të Komunave me Shumicë Serbe” absolutisht nuk përkon me propozimin Evropiano-Amerikan që i është dorëzuar kryeministrit Kurti në takimin e 21 tetorit si plan për ecjen përpara.
Falënderojmë ato medie të cilat para publikimit apo shpërndarjes së këtij lajmi kanë kontaktuar Zyrën e Kryeministrit për konfirmim dhe verifikim të raportimit, duke shmangur kështu keqinformimin e mëtejmë të publikut.
