Perparim Rama
Kryetari i Komunës së Prishtinës, Përparim Rama ka deklaruar se është shkarkuar kryeshefi ekzekutiv i NPL Prishtina Parking.
Kjo sipas Ramës është bërë në mbledhjen e jashtëzakonshme të bordit të drejtorëve të ndërmarrjes nën konstatimet se i njëjti ka keqpërdorur detyrën zyrtare dhe nuk ka informuar bordin në lidhje me planet dhe projektet investuese.
Ky është njoftimi i plotë:
Shkarkohet nga pozita e Kryeshefit Ekzekutiv të NPL Prishtina Parking, z. Liridon Restelica.
Në mbledhjen e jashtëzakonshme të mbajtur sot, Bordi i Drejtorëve të NPL “Prishtina Parking” ka konstatuar se veprimet e Kryeshefit Ekzekutiv, duke përfshirë këtu keqpërdorimin e pozitës, mosinformimin e bordit në lidhje me planet dhe projektet investuese të ndërmarrjes e deri tek mospërfillja e Bordit të Drejtorëve, kanë shkaktuar keqmenaxhim të përgjithshëm të ndërmarrjes dhe kanë cenuar imazhin e NPL “Prishtina Parking”.
Vendimi për shkarkimin nga pozita e Kryeshefit Ekzekutiv, z. Liridon Restelica, hyn në fuqi sot, me datë 22.08.2022.
