Një delegacion i lartë amerikan i prirë nga Elizabeth Sharewood-Randall, këshilltare për Siguri Kombëtare e Presidentit Joe Biden, qëndroi në Kosovë.
Në takime të ndara, mysafirët nga Shtëpia e Bardhë i priti presidentja Vjosa Osmani dhe kryeministri Albin Kurti, njofton Klan Kosova.
Deklarata pas takimit nuk pati. Presidentja përmes kumtesës njoftoi se marrëdhëniet politike, ushtarake e ekonomike Kosovë-SHBA do të forcohen edhe më.
Këto i quajti ekzistenciale e strategjike.
Klan Kosova, mëson se në veçanti u folën çështjet e forcimit të sigurisë kombëtare të Kosovës, tani pas luftës Rusi-Ukrainë si dhe aspiratat e republikës së vogël për anëtarësim në NATO.
U dha edhe këshilla amerikane që autoritetet në Prishtinë t’u mundësojnë votimet për zgjedhjet e Serbisë më 3 prill.
Kjo, sipas një modeli të përshtatshëm e të pranueshëm për palën kosovare e atë serbe.
Ardhja e Elizabeth Sharewood-Randall dhe tjerëve zyrtarë amerikan, është më e madhja e këtij niveli që ka ndodhur në Kosovë, në tre vitet e fundit.
Më 27 dhe 28 shkurt 2019, këtu kishin qëndruar John Erath dhe Brad Berkley, atëbotë zyrtarë të lartë në Këshillin e Sigurisë Kombëtare të Amerikës.
