Ministri i Mbrojtjes, Armend Mehaj, ka njoftuar se është arritur kontrolli i  pothuajse të gjitha vatrave të zjarrit, në territorin e Kosovës.

Përmes një njoftimi në facebook, Mehaj tha se njësitet e FSK-së bashkë me ekipet tjera emergjente, të mbështetur edhe nga KFOR, do të vazhdojnë vëzhgimin e zonave të përfshira.

“Pjesëtarë e Forcës së Sigurisë së Kosovës në bashkërendim me  KFOR, njësitet e zjarrëfikësve të komunave, Policinë e Kosovës, si dhe institucionet tjera, kanë arritur që të vënë nën kontroll pothuajse të gjitha vatrat e zjarrit në territorin e vendit tonē.

Gjatë ditëve në vijim, njësitet e FSK-së do të vazhdojnë të bëjnë vëzhgimin e terrenit si dhe vlerësimin e situatës në vendin tonë, me qëllim reagimin në kohë për shpëtimin e jetërave të njerëzve, pasurisë së qytetarëve dhe minimizimin e pasojave”, shkruan ai.

Mehaj apeloi te qytetarët ta mbrojnë ambientin, përmes disa këshillave:

“Mos digjni barin, bimësitë e ulëta dhe plehrat në ambiente të hapura, në mjedise urbane apo në sipërfaqet e punueshme në afërsi të pyllit. Mos ndizni skarën në mjedis të hapur, në afërsi të pyllit ose në afërsi të barit dhe degëve të thata. Shmangni punimet në vende të hapura, pasi ato mund të shkaktojnë zjarr. Mos hedhni mbeturinat në pyll ose në afërsi të pyllit sepse ekziston mundësia e vetëndezjes. Mos pini duhan gjatë korrjes së të mbjellave. Respektoni shenjat e ndalimit të hyrjes në fushat me rrezik të lartë nga zjarri. Denonconi keqbërësit te autoritetet përgjegjëse”.

• 

Shkrimi i plotë

Qytetarë të dashur,

Njësitet e Forcës së Sigurisë së Kosovës, të vendosura në gjendje të gatishmërisë gjatë gjithë ditëve të kaluara, kanë mbështetur autoritetet civile për menaxhimin e situatës së shkaktuar nga zjarret.

Pjesëtarë e Forcës së Sigurisë së Kosovës në bashkërendim me  KFOR, njësitet e zjarrëfikësve të komunave, Policinë e Kosovës, si dhe institucionet tjera, kanë arritur që të vënë nën kontroll pothuajse të gjitha vatrat e zjarrit në territorin e vendit tonē.

Gjatë ditëve në vijim, njësitet e FSK-së do të vazhdojnë të bëjnë vëzhgimin e terrenit si dhe vlerësimin e situatës në vendin tonë, me qëllim reagimin në kohë për shpëtimin e jetërave të njerëzve, pasurisë së qytetarëve dhe minimizimin e pasojave.

Edhe njëherë apelojmë te të gjithë:

Mos hidhni cigaret e ndezura në mjedise të hapura.

Mos digjni barin, bimësitë e ulëta dhe plehrat në ambiente të hapura, në mjedise urbane apo në sipërfaqet e punueshme në afërsi të pyllit.

Mos ndizni skarën në mjedis të hapur, në afërsi të pyllit ose në afërsi të barit dhe degëve të thata.

Shmangni punimet në vende të hapura, pasi ato mund të shkaktojnë zjarr.

Mos hedhni mbeturinat në pyll ose në afërsi të pyllit sepse ekziston mundësia e vetëndezjes.

Mos pini duhan gjatë korrjes së të mbjellave.

Respektoni shenjat e ndalimit të hyrjes në fushat me rrezik të lartë nga zjarri.

Denonconi keqbërësit te autoritetet përgjegjëse.

Kujdesi juaj, ndihma më e madhe për ne!