Kryetari i Sindikatës se Pavarur të Sektorit Privat të Kosovës, Jusuf Azemi në një konferencë për media, ka njoftuar se që nga nesër rreth 2000 punëtorë teknik nëpër spitalet e Kosovës, do të hyjnë në grevë.
Azemi ka thënë se greva vjen pas mos realizimit të kërkesave të tyre, për pagesë shtesë nga Qeveria, ashtu siç janë paguar kategoritë tjera në sektorin e shëndetësisë.
Ai ka thënë se në të gjithë vendin, përjashtim QKUK-së do të futën në grevë.
“Punëtorët e QKUK-së janë të mashtruar kinse do të paguhen. Një herë u tha se do t’i marrin pagat të mërkurën që shkoj, gjë që nuk ndodhi”, ka thënë ai.
Azemi thotë se kjo grevë është ligjore dhe duhet të respektohet nga të gjithë.
Ndërsa bënë thirrje që emergjencat, sallat operacioneve duhet të jenë të pastra.
Ai thotë pronarët e kompanive nuk duhet t’iu bëjnë presion punëtorëve për mos mbajtje të grevës, pasi që këta punëtorë janë duke lypur të drejtat e tyre.
Greva sipas tij, po mbahet me kërkesën e rreth 2000 punëtorëve.
