Ministri i Drejtësisë, Selim Selimi ka pritur në takim ministrin e Punëve të Brendshme të Shqipërisë, Sander Lleshaj.

Selimi në këtë takim me Lleshajn kanë diskutuar për arrestimet të cilat janë kryer nga Dhomat e Specializuara së fundi në Kosovë me ç’rast ka shprehur shqetësimin e tij për formën se si janë zhvilluar këto arrestime.

“E di mirë dhe e kam të qartë që pushtetet janë të ndara, andaj nuk duhet të lejojmë që drejtësia të përzihet në politikë, por edhe anasjelltas. Arrestimet e tilla shkaktojnë shqetësim tek qytetarët. Ftesat e Dhomave të Specializuara duhet të respektohen siç̧ edhe po ndodhë. Besojmë në drejtësi sepse lufta jonë ka qenë e pastër”, citohet të ketë thënë Selimi sipas komunikatës së Ministrisë së Drejtësisë.

Selimi dhe Lleshaj kanë diskutuar edhe për mundësinë e shkëmbimit të përvojave në luftën kundër terrorizmit dhe parandalimi i ekstremizmit.

“Ne, si Ministri e Drejtësisë, përmes komitetit për luftimin e terrorizmit dhe parandalimin e ekstremizmit, një vit më parë kemi arritur të sjellim gra dhe fëmijë nga Siria”, tha Selimi.

Lleshaj në kuadër të këtij diskutimi shprehu gatishmërinë për avancimin e bashkëpunimit mes Ministrisë së Drejtësisë dhe Ministrisë së Punëve të Brendshme të Shqipërisë.

Dy ministrat u pajtuan që për Kosovën dhe Shqipërinë integrimi në Bashkimin Evropian mbetet synim e për këtë fuqizimi i sundimit të ligjit mbetet jetik.