Askush nuk mund të rezistojë faqet topolake të bebeve. Aq të buta e të rrumbullakëta. Por siç rezulton, këto puthje në të vërtetë mund të rrezikojnë shëndetin e vogëlushit tuaj.
Claire Henderson, një nënë në Doncaster të Mbretërisë së Bashkuar, kohët e fundit postoi fotografi të foshnjës së saj të shtruar në spital me plagë nga virusi herpes. Fatkeqësisht, foshnja ishte puthur afër buzëve dhe mjekët gjetën virusin e herpesit në mjekër, faqe dhe buzë, shkruan Verywell Family, transmeton Insajderi.
Ekzistojnë dy lloje të ndryshme të virusit herpes:
- Virusi i herpesit oral (HSV-1)
- Virusi i herpesit gjenital (HSV-2)
Por foshnjat nën tre muaj nuk janë në gjendje të luftojnë kundër virusit dhe ai mund të kthehet vdekjeprurës shumë shpejt.
Akademia Amerikane e Pediatrisë (AAP) paralajmëron se herpesi tek bebet mund të shkaktojë sëmundje serioze. Për fëmijët më të vjetër dhe të rriturit, virusi herpes thjesht mund të kryejë rrjedhën e tij, të shkaktojë plagë dhe pastaj të marrë fund. Por herpesi tek bebet, sidomos te porsalindurit, gjithmonë kërkon shtrimin në spital dhe trajtimin.
Virusi, në formë HSV-1, mund t’i kalohet një fëmije përmes puthjes, si në tregimin e Henderson, ose nga nëna tek fëmija gjatë lindjes – në formën e herpesit gjenital HSV-2. Në të sapolindurit, virusi mund të sulmojë mëlçinë, mushkëritë, sistemin nervor qendror, lëkurën, sytë dhe gojën.
Edhe me mjekimin dhe trajtimin e duhur, AAP paralajmëron se herpesi mund të shkaktojë sëmundje serioze dhe madje edhe vdekjen. Dhe natyrisht, kushdo që infektohet me herpes në çdo kohë do të jetë bartës i virusit për jetën.
Henderson postoi fotot e saj sepse nuk e kishte idenë për rrezikun e përhapjes së herpesit përmes puthjeve të thjeshta tek një fëmijë; ajo dëshironte të paralajmëronte prindërit e tjerë për shenjat dhe simptomat. Sipas AAP, disa nga shenjat dhe simptomat e herpesit tek foshnjat përfshijnë:
- Acarim të lëkurës
- Ethe
- Irritimi i qepallave ose syve në muajin e parë të jetës
- Gjëndrat e fryra
- Humbja e oreksit
Burimi: verywellfamily.com
