Besnik Leka së bashku me vëllain e tij kanë një dyqan ndryshe nga të tjerët në Prishtinë.

Nga lloje të ndryshme drurësh, disa penj dhe një abazhur të thjeshtë, Besnik Leka, së bashku me vëllain Petritin krijojnë forma të ndryshme të llambave ndriçuese.

Besniku, i ftuar në “Pasdite” në RTV Dukagjini, tregoi edhe mënyrën e përgatitjes së një llambe të thjeshtë, me një dekor nga druri.

Pronari i këtij artizanati, thotë se llambat kryesisht punohen nga drurët që nuk janë më në shërbim.

Sipas tij, preferohet druri i arrës, por është e rëndësishme të ruhet ambienti e jo të dëmtohet ai.

Çmimi i këtyre llambave unike fillon nga 15 euro deri në 130 euro.

Sipas Petritit, qëllimi nuk është targetimi i personave që kanë mundësi më të mëdha financiare, por t’u mundësohet edhe studentëve e çdokujt tjetër, pavarësisht mundësive financiare.

Llambat zakonisht nuk marrin shumë kohë për ndërtim, deri ne tri orë, por nëse lyhen, koha e përshtatshme për përdorim rekomandohet të jetë 24 orë.

Pasionanti i llambave, thotë se konkurrencë mbeten llambat industriale, por sipas tij puna e dorës mbetet unike./Telegrafi/