Ish-kryetari i Këshillit Shtetëror të Cilësisë i Agjencisë së Kosovës për Akreditim, Blerim Rexha, ia kishte dërguar një letër organizatës ndërkombëtare Regjistri Evropian për Cilësi të Arsimit të Lartë (European Quality Assurance Register for Higher Education – EQAR), në muajin shtator, kohën kur kryeministri Haradinaj e shkarkoi atë dhe krejt bordin e kësaj Agjencie. Ky shkarkim që ndodhi sapo Haradinaj erdhi në Qeveri, u arsyetua me parregullsitë dhe shkeljet e raportuara nga ana e këtij bordi.
Vetëm disa muaj më vonë, pas letrës së dërguar në po këtë organizatë, nga Blerim Rexha, Kosova përjashtohet nga Regjistri Evropian për Cilësi të Arsimit të Lartë.
Shkarkimi i bordit të Agjencisë Kosovare të Akreditimit, që kishte bërë kryeministri Ramush Haradinaj menjëherë pasi kishte formuar Qeverinë e tij, ka lënë pasoja për Kosovën në rrafshin ndërkombëtar.
Në mungesë të bordit, vendi është përjashtuar nga Regjistri Evropian për Sigurimin e Cilësisë të Arsimit të Lartë (EQAR). Por në drejtim të kësaj organizate, ishte nisur edhe një letër ku shpreheshin të gjitha pakënaqësitë e këtij vendimi të kryeministrit.
Blerim Rexha i kishte paraqitur shqetësimet e tij dhe të anëtarëve të shkarkuar, në një raport trefaqësh.
Ish-kryetari i këtij bordi, në letër shkruan se fatkeqësisht, në mes të anëtarëve të agjencisë dhe kryeministrit apo edhe ministrit të Arsimit nuk kishte pasur konsultime paraprake. “Qartësisht, gjithë këto ne i dëgjuam përmes medieve”, shkruan Rexha.
Tutje, ai duke e komentuar vendimin e Haradinajt, thotë se e kupton rëndësinë që ka llogaridhënia publike drejtuar komunitetit akademik e shoqërisë, dhe se për këtë arsye ata janë të përgatitur që t’i japin të gjitha faktet për vendimet dhe arritjet.
Megjithatë, Rexha duke e quajtur këtë vendim si arbitrar, thotë se është shumë ndryshe në ruajtjen e përgjegjësisë, por thekson se kjo është ngatërruar me nocionin shumë të çmuar të pavarësisë.
Sidoqoftë, organizata EQAR në raportin e saj ku flet për përjashtimin e Kosovës, konsideron se Agjencia Kosovare e Akreditimit nuk funksionon më e pavarur, kësisoj nuk i përmbush standardet evropiane të agjencive të arkëtimit.
Si rezultat i kësaj, AKA-ja përjashtohet nga një union i rëndësishëm i Sigurimit të Cilësisë së Arsimit të Lartë.
