Mbrëmja e së premtes i është rezervuar supersfidës së Serie A, Napoli-Juventus, dy skuadra që janë në një duel të fortë për titullin kampion në Itali, së bashku me Interin.

Në San Paolo do të zbresin në fushën e lojës dy skuadra që kanë në përbërje futbollistë, që në total e kanë vlerën në tregun e transferimeve 1.08 miliardë euro.

Kjo është ajo që publikon e përditshmja italiane Corriere dello Sport, sipas së cilës vlera në tregun e futbollistëve të Napolit arrin në 497.2 milionë euro.

Padyshim më i vlerësuari te skuadra e Maurizio Sarrit është Lorenzo Insigne, me 100 milionë euro, i ndjekur nga Kalidou Koulibaly me 54 milionë dhe Marek Hamsik me 40 milionë.

Sipas kësaj të përditshmeje, vlera e Elseid Hysajt është 25 milionë euro, duke lënë pas spanjollin Jose Callejon, me 20 milionë.

Në krahun tjetër, Juventusi ka një vlerë në treg prej 589 milionë eurosh. Për kampionët e Italisë, futbollisti më i kushtueshëm është Paulo Dybala, me 100 milionë euro, i ndjekur shumë pranë nga Gonzalo Higuain me 90 milionë, me argjentinasin që ndryshe nga sa u raportua në media ditët e fundit, duket se do të jetë në stol në sfidën e San Paolos.

Podiumin e futbollistit më të shtrenjtë te Zonja e vjetër e mban Douglas Costa, me 46 milionë euro. /TCh/