Moska e ka paralajmëruar SHBA-në se nëse milicitë, të cilat i përkrah ajo në verilindje të Sirisë, i sulmojnë përsëri pozicionet e forcave pro-qeveritare të mbështetura nga Rusia, atëherë ushtria ruse do ta përdorë të gjithë forcën e vet për t’u kundërpërgjigjur.
Trupat e Forcave Demokratike të Sirisë (SDF), një milici kryesisht kurde që merr përkrahje nga ushtria amerikane, i kanë sulmuar dy herë pozicionet e Ushtrisë Siriane Arabe në Deir ez-Zor me raketa dhe mortaja, ka thënë zëdhënësi i Ministrisë së Mbrojtjes të Rusisë, Igor Konashenkov, transmeton Express.
“Rusia qartazi u ka thënë komandantëve të forcave amerikane në bazën ajrore “Al Udeid” se nuk do ta tolerojë asnjë sulm nga zonat ku SDF është e vendosur”, ka thënë Konashenkov.
Ai ka shtuar se sulme të tilla i vënë në rrezik këshilltarët e ushtrisë ruse të angazhuar me trupat e qeverisë siriane.
