Pas një beteje ligjore 10-vjeçare, Gjykata e Apelit ka liruar përfundimisht nga të gjitha akuzat veteranin e UÇK-së, Ahmet Daku.
Përmes një postimi ne rrjetet sociale, Daku u shpreh se sot triumfoi e vërteta dhe drejtësia ndaj akuzave të pabaza. Ai gjithashtu shprehu shpresën që drejtësia të vërtetohet sa më parë edhe për ish-krerët e UÇK-së që ndodhen në Hagë, Hashim Thaçi, Kadri Veseli, Jakup Krasniqi dhe Rexhep Selimi, duke uruar kthimin e tyre pranë familjeve dhe në Kosovë.
Postimi i plotë:
Sot është një ditë që na mbush zemrat me krenari, emocion dhe besim se e vërteta, sado që të sprovohet, në fund gjithmonë gjen rrugën e saj.
Pas një rrugëtimi 10 vjeqar, të gjatë e të vështirë, sot mora lajmin e mirë se nga Gjykata e Apelit jemi liruar përfundimisht nga të gjitha akuzat. Ky vendim është një dëshmi se e drejta mund të vonojë, por nuk mund të mposhtet. Sot triumfoi drejtësia dhe u dëshmua edhe një herë se të vërtetën nuk mund ta mbulojnë padrejtësitë dhe akuzat e pabaza.
Me zemër të pastër dhe me besim te Zoti, uroj dhe lutem që sa më shpejt të vijë dita e drejtësisë edhe për drejtuesit tanë që vazhdojnë të gjenden në Hagë, Hashim Thaçi, Kadri Veseli, Jakup Krasniqi dhe Rexhep Selimi. Uroj që edhe ata të kthehen sa më parë pranë familjeve të tyre dhe në Kosovën për të cilën dhanë gjithçka.
Ne nuk e harruam kurrë sakrificën, nuk e harruam gjakun e dëshmorëve dhe nuk do ta harrojmë kurrë çmimin e lirisë.
Sot, më shumë se kurrë, besojmë se e vërteta dhe drejtësia do të triumfojnë përfundimisht.
Liria ka emër UÇK!
Lavdi e përjetshme dëshmorëve të kombit!
Rroftë Kosova e lirë!
