Ish lideri i UÇK-së dhe kryetari i BDI-së, Ali Ahmeti ka bërë thirrje për pjesëmarrje në Marshin për Liri, i cili do të mbahet më 12 shtator, nga ora 14:00, në sheshin “Skënderbeu” në Prishtinë.
Përmes një postimi në Facebook, Ahmeti ka ftuar qytetarët që të bashkohen në mbështetje të luftëtarëve të lirisë dhe vlerave të Ushtrisë Çlirimtare të Kosovës.
“Të dashur vëllezër e motra, më 12 shtator, në ora 14:00, në sheshin ‘Skënderbeu’ në Prishtinë, ju ftoj të bashkohemi në mbështetje të luftëtarëve të lirisë dhe vlerave të Ushtrisë Çlirimtare të Kosovës”, ka shkruar Ahmeti.
Ai ka theksuar rëndësinë e sakrificës së atyre që luftuan për lirinë e Kosovës, duke shprehur besimin se drejtësia dhe liria duhet të triumfojnë.
“Të marshojmë së bashku për ata që sakrifikuan për lirinë e Kosovës, me besimin se pas çdo sakrifice dhe pritjeje duhet të triumfojnë drejtësia dhe liria”, ka deklaruar Ahmeti.
Kreu i BDI-së e ka përmbyllur mesazhin e tij me thirrjen: “Për luftëtarët tanë, për heronjtë e luftës dhe të paqes, për UÇK-në!”.
Marshi për Liri do të mbahet më 12 shtator në Prishtinë, në prag të vendimit në procesin gjyqësor ndaj ish-krerëve të UÇK-së në Hagë.
