Ministri për Familje dhe Mirëqenie Sociale, Andin Hoti, ka deklaruar në një intervistë për Euronews Albania se mungesa e bashkëpunimit nga Serbia vazhdon të jetë pengesa kryesore për zbardhjen e fatit të babait të tij, veprimtarit të zhdukur Ukshin Hoti.
Ai theksoi se babai i tij ishte marrë nga institucionet shtetërore të sigurisë në Serbi, duke vënë përgjegjësinë direkte mbi autoritetet serbe.
“Në aspektin e babait, që është çështje pak më personale, por si kryetar i Komisionit, ne në fakt i kemi këtu disa pista, por ajo që mungon në thelb në raport me informatat për babain është mosbashkëpunimi total i Serbisë. Sepse e dini që babai nuk është që është marrë prej rrugës apo situatë tjetër, është marrë prej institucioneve shtetërore të sigurisë dhe përgjegjësia direkte është e pushtetit atje.
Dhe ata kanë refuzuar në vazhdimësi, se e keni përcjellë, ne kemi kërkuar, ne kemi edhe delegacionin kosovar se po shkojmë me ditë të tëra në Serbi pikërisht për këtë çështje, me mesazhe të ndryshme. Deklarata që kemi… që kemi arritur me 2 maj, në vazhdimësi ka pasur kërkesë që çështja e informatave për personat e zhdukur, por natyrisht edhe për rastet e tjera.
Besoj që këtu nuk është një çështje teknike, e as e lehtë, e as nuk mjafton ana profesionale e jona, por duhet vullnet politik. Po ashtu duhet një lloj presioni nga bashkësia ndërkombëtare që Serbia të dorëzojë informacionet për fatin e babait. Nuk besoj që fati i babait mund të zbardhet me ato që ne i kemi, me resurset që ne i kemi, me informatat që i kemi, pa u dhënë ato që i kam përmendur disa herë, arkivat e klasifikuara që Serbia vazhdon t’i mbajë në sekret”, tha Hoti.
