Inspektorati Qendror i Punës ka dalë me një reagim të dytë lidhur me aksidentin tragjik të ndodhur dje në një kantier ndërtimi në Prishtinë, ku si pasojë e rrëzimit të një krani humbi jetën një punëtor, ndërsa një tjetër mbeti i lënduar.
Institucioni ka shprehur edhe një herë ngushëllimet për familjen e viktimës dhe ka uruar shërim të shpejtë për punëtorin e lënduar, duke bërë të ditur se rasti po trajtohet me prioritet të lartë në bashkëpunim me Policinë e Kosovës, Prokurorinë dhe institucionet e tjera kompetente.
Në reagim, Inspektorati ka sqaruar se mbikëqyrja e zbatimit të legjislacionit për Sigurinë dhe Shëndetin në Punë, në raport me punëtorët, kontraktorët dhe nënkontraktorët, është përgjegjësi e këtij institucioni. Ndërkaq, sipas tij, siguria e palëve të treta dhe zbatimi i masave të sigurisë në kantieret e ndërtimit, sipas Ligjit për Ndërtim, është kompetencë e inspektorateve komunale të ndërtimit.
Po ashtu, Inspektorati thekson se nuk ka kompetencë ligjore për të vlerësuar nëse janë përmbushur kushtet për lëshimin e lejes ndërtimore, pasi kjo është përgjegjësi e autoriteteve të tjera kompetente.
Sipas njoftimit, në këtë fazë është ende herët për të nxjerrë përfundime mbi shkaqet e aksidentit, pasi ato do të përcaktohen vetëm pas hetimeve dhe ekspertizave të nevojshme. Nëse konstatohen shkelje të legjislacionit për Sigurinë dhe Shëndetin në Punë, Inspektorati ka bërë të ditur se do të ndërmarrë të gjitha masat ligjore brenda kompetencave të tij.
Institucioni ka ngritur edhe shqetësimin se aktualisht nuk njoftohet në mënyrë sistematike nga komunat për lëshimin e lejeve ndërtimore apo fillimin e punimeve në kantieret e reja, duke bërë që planifikimi i inspektimeve të bazohet kryesisht në monitorimin e terrenit, raportimet e qytetarëve dhe burime të tjera të informacionit.
Për këtë arsye, Inspektorati Qendror i Punës ka njoftuar se do të iniciojë diskutime me institucionet përgjegjëse për krijimin e një mekanizmi të rregullt të koordinimit dhe shkëmbimit të informacionit, me synim identifikimin më të hershëm të kantiereve të reja dhe forcimin e mbikëqyrjes parandaluese në fushën e sigurisë dhe shëndetit në punë.
