Ministria e Ekonomisë ka njoftuar se është shtyrë afati për aplikim në Skemën e Granteve për Energji të Pastër – Faza 2, e cila u dedikohet ndërmarrjeve mikro, të vogla dhe të mesme.
Sipas njoftimit, vendimi është marrë në koordinim me Agjencinë për Investime dhe Përkrahje të Ndërmarrjeve në Kosovë (KIESA) dhe Agjencinë e Luksemburgut për Bashkëpunim Zhvillimor (LuxDev).
“Ministria e Ekonomisë në koordinim me Agjencinë për Investime dhe Përkrahje të Ndërmarrjeve në Kosovë (KIESA) dhe Agjencinë e Luksemburgut për Bashkëpunim Zhvillimor LuxDev, njofton të gjitha ndërmarrjet mikro, të vogla dhe të mesme se është shtyrë afati për aplikim në Skemën e Granteve për Energji të Pastër – Faza 2”, thuhet në njoftim.
Ministria bën të ditur se aplikimi do të mbetet i hapur deri më 9 gusht 2026, në orën 24:00.
“Aplikimi mbetet i hapur deri më datë: 09.08.2026 deri në orën 24:00”, theksohet në njoftim.
Sipas Ministrisë, shtyrja e afatit synon t’u japë bizneseve më shumë kohë për përgatitjen e dokumentacionit të nevojshëm dhe për të siguruar pjesëmarrje sa më të gjerë në këtë skemë mbështetëse.
“Ky vendim është marrë me qëllim që t’u ofrohet bizneseve të interesuara kohë shtesë për përgatitjen dhe dorëzimin e dokumentacionit të nevojshëm, duke mundësuar një pjesëmarrje sa më të gjerë në këtë skemë mbështetëse”, thuhet më tej.
Ministria ka bërë të ditur se të gjitha kushtet, kriteret dhe dokumentacioni i kërkuar për aplikim mbeten të pandryshuara, sipas Thirrjes Publike të publikuar më 7 korrik 2026, ndërsa aplikimi vazhdon të bëhet përmes platformës eKosova.
